Zelenski: Papa Fransisk dünyanın ən mühüm dini liderlərindən biri idi
Ukrayna prezidenti Vladimir Zelenski Roma Papası Fransiskin vəfatı ilə bağlı dərin hüzn hissi keçirdiyini bildirib və onu “dünyanın aparıcı dini liderlərindən biri” adlandırıb. Zelenski Ukrayna adından başsağlığı verib və şənbə günü keçiriləcək dəfn mərasimində ölkəsinin rəsmi olaraq təmsil olunacağını təsdiqləyib.
Crossmedia.az xarici mediaya istinadən bildirir ki, Prezident çıxışı zamanı həm Pasxa bayramı münasibətilə təbriklərini çatdırıb, həm də müharibə dövründə dini həmrəyliyin əhəmiyyətini vurğulayıb. “Bu birlik hissi – bəlkə də bizdə olan ən qiymətli şey – bizə işğalçıya qarşı möhkəm dayanmaq üçün güc verir,” – deyə o qeyd edib.
Zelenski X sosial media platformasında Papaya Ukrayna üçün etdiyi dualara və müharibə dövründə verdiyi ümid mesajlarına görə təşəkkür edib. O, “mənəvi diplomatiya”nın əhəmiyyətini xüsusi vurğulayıb.
Zelenski sonuncu dəfə 2024-cü ilin oktyabrında Vatikanda Papa Fransisklə görüşüb və ona “Buça qırğını – Mariçkanın hekayəsi” adlı yağlı boya tablosunu hədiyyə edib. Papa Fransisk müharibə dövründə dəfələrlə sülh çağırışları etsə də, bəzi açıqlamaları Ukraynada tənqidə səbəb olub.
Zelenskinin bu açıqlamaları Rusiyanın Pasxa atəşkəsini pozaraq Ukraynaya qarşı hücumlarını davam etdirdiyi bir vaxta təsadüf edir. Təkcə son günlərdə 2900-dən çox atəşkəs pozuntusu qeydə alınıb, Xersonda isə 3 mülki şəxs həlak olub.
Zəhra Ağayeva
16:35 23.04.2025
Oxunuş sayı: 9889
