Yeniyetmələr sosial medianın təhlükələrini dərk etməyə başlayır
Xarici araşdırma mərkəzinin keçirdiyi sorğuda iştirak edən, ABŞ-da yaşayan 1,391 yeniyetmədən demək olar ki, yarısı sosial medianın yaşıdlarının psixi sağlamlığına mənfi təsir etdiyini bildirib. Onların əksəriyyəti texnologiyanın bu təsirindən narahat olduqları üçün sosial şəbəkələrdən və smartfonlardan istifadəni azaltdıqlarını deyiblər.
Crossmedia.az xarici mediaya istinadən bildirir ki, sorğu nəticələrinə əsasən, yeniyetmələrin 48%-i sosial medianın yaşıdlarına “əsasən mənfi” təsir etdiyini düşünür. Bu göstərici 2022-ci ildəki 32%-lə müqayisədə xeyli artıb. Hazırda yalnız 11% sosial medianı “əsasən müsbət” hesab edir.
Bununla belə, cəmi 14% sosial medianın özlərinə mənfi təsir etdiyini bildirib. Bu da əvvəlki illə müqayisədə artım deməkdir. Yeniyetmələrin 45%-i sosial mediada çox vaxt keçirdiklərini etiraf edib və 44%-i bu səbəbdən istifadələrini azaltmağa çalışdıqlarını deyib.
Hesabatda qeyd olunur ki, sosial medianın təsiri cins və etnik mənsubiyyətə görə də fərqlənir. Məsələn, qızlar oğlanlara nisbətən sosial medianın yuxuya, məhsuldarlığa, özlərinə inama və psixi sağlamlığa daha çox mənfi təsir etdiyini düşünürlər.
Araşdırmada həmçinin yeniyetmələrin sosial medianın bəzi müsbət tərəflərini də qeyd etdikləri bildirilir. Belə ki, onların 60%-i sosial medianı yaradıcılıqlarını göstərmək üçün bir platforma hesab edir, daha çoxu isə dostlarının həyatından xəbərdar qalmaq üçün istifadə etdiyini bildirir.
Fatimə Nəbiyeva
15:35 23.04.2025
Oxunuş sayı: 11063
