ABŞ və Rusiya Arktikada əməkdaşlıq edəcək, yoxsa rəqib olacaq?
2025-ci ildə Arktika yenidən dünya siyasətinin ən çox müzakirə olunan mövzularından birinə çevrilib. ABŞ Prezidenti Donald Trampın Qrenlandiya və Kanadanı ABŞ-a birləşdirmək çağırışı ciddi mübahisələrə səbəb olub. Eyni zamanda, Vaşinqtonla Moskva arasında ilk təmaslarda Arktika mövzusunun gündəmə gəlməsi, media orqanlarında bu əməkdaşlığın detalları və Ukrayna münaqişəsi ilə mümkün əlaqələri barədə ehtimalların yayılmasına səbəb olub. Bütün bunlar Murmanskda keçirilən Beynəlxalq Arktika Forumu ilə eyni vaxta təsadüf edib. Forumda Rusiya Prezidenti Vladimir Putin Arktikanın inkişafının ölkə üçün uzunmüddətli prioritet olduğunu bir daha vurğulayıb.
Crossmedia.az xarici mediaya istinadən bildirir ki, Donald Tramp prezidentlik müddətində Arktikada liderlik etmək zərurətini dilə gətirib. O, Qrenlandiyanın ABŞ üçün strateji əhəmiyyət daşıdığını, orada faydalı qazıntıların olduğunu və Danimarkanın adanı qoruya bilmədiyini iddia edərək, Qrenlandiyanın ABŞ-a birləşdirilməsini milli təhlükəsizlik məsələsi kimi təqdim edib. Tramp hətta bu birləşmənin hərbi yolla mümkün ola biləcəyini də istisna etməyib.
Son aylarda Trampın oğlu və ABŞ vitse-prezidenti Cey Di Vens Qrenlandiyaya səfər ediblər. Bu, Danimarka tərəfindən narazılıqla qarşılanıb. Vens bildirib ki, Rusiya, Çin və başqa ölkələr Arktika nəqliyyat yolları və resurslarına maraq göstərir. ABŞ isə bu regionda öz maraqlarını qorumaq üçün buzqıran və hərbi gəmilərə yatırım etməyi planlaşdırır.
Yeni administrasiyanın əsas məqsədlərindən biri nadir torpaq metallarına nəzarətdir. Qrenlandiya üzərində nəzarət ABŞ-ın bu sahədə ehtiyatlarını ikiqat artırmaq imkanı yarada bilər.
Fatimə Nəbiyeva
15:28 23.04.2025
Oxunuş sayı: 10877
