Trampın Çin tariflərini azaltması bazarları canlandırdı
ABŞ Prezidenti Donald Trampın Çin mallarına tətbiq edilən tarifləri “əhəmiyyətli dərəcədə” azaldacağını bildirməsi qlobal maliyyə bazarlarında nikbinlik yaradıb. ABŞ-ın maliyyə naziri Skott Bessentin yüksək tariflərin davamlı olmayacağına dair açıqlaması da bu gözləntiləri gücləndirib.
Crossmedia.az xarici mediaya istinadən bildirir ki, Prezident Tramp Ağ Evdə etdiyi çıxışında, tariflərin tam ləğv edilməyəcəyini, lakin ciddi şəkildə azaldılacağını bildirib. Həmçinin, Federal Ehtiyat Sistemi (FED) sədri Cerom Paueli vəzifədən çıxarmaq niyyətində olmadığını vurğulayıb və faiz dərəcələrinin endirilməsinin vaxtı çatdığını qeyd edib.
Bu açıqlamalardan sonra ABŞ-ın əsas indeksləri – Dow Jones, S&P 500 və Nasdaq – müvafiq olaraq 1,13%, 1,51% və 1,76% artıb. Asiya və Avropa birjalarında da müsbət dinamika müşahidə olunub. ABŞ dolları möhkəmlənib, qızıl qiymətləri isə enib. Eyni zamanda, bitkoin 6,25% bahalaşaraq 93 400 dollardan yuxarı ticarət olunub.
Ekspertlər bazarlardakı bu yüksəlişin davamlı olub-olmayacağına ehtiyatla yanaşırlar, çünki ticarət qeyri-müəyyənliyi və qlobal iqtisadi risklər hələ də qalmaqdadır.
Fatimə Nəbiyeva
14:40 23.04.2025
Oxunuş sayı: 10057
