Ukrayna prezidenti Rusiya ilə danışıqların mümkün yollarını AÇIQLADI
"Rusiya ilə mümkün danışıqlar üçün beynəlxalq vasitəçilik formatına açığıq".
Crossmedia.az xarici KİV-ə istinadən xəbər verir ki, bunu Ukrayna Prezidenti Volodimir Zelenski "Filadelfiya Inquirer" qəzetinə verdiyi müsahibədə açıqlayıb.
Onun sözlərinə görə, əsas şərt Ukraynanın maraqlarına uyğun sənədin hazırlanmasıdır.
Zelenski qeyd edib ki, Ukrayna müvafiq sənədlər və metodologiya əsasında danışıqlar modelini inkişaf etdirə bilər:
"Türkiyə və BMT-nin vasitəçiliyi ilə Ukrayna və Rusiya nümayəndələri arasında imzalanmış iki ayrı razılaşma mövcuddur. Buna misal olaraq taxıl dəhlizini qeyd edə bilərəm, razılaşma uzun müddət uğurla fəaliyyət göstərdi. Belə bir mexanizm ərazi bütövlüyü, enerji və naviqasiya azadlığı kimi məsələlərin həllində də tətbiq oluna bilər".
Dövlət başçısı bildirib ki, Ukraynanın tərəfdaşları yalnız Qərb ölkələri ilə məhdudlaşmır:
"Bizim tərəfdaşlarımız təkcə Avropa və ABŞ deyil, həm də Asiya, Sakit okean hövzəsi, Afrika və Latın Amerikasının bir çox ölkələri ola bilər. Əgər hər hansı böhranın həlli yollarını hazırlayan nümayəndələr varsa və nəticədə əldə olunan sənəd Ukraynanı qane edirsə, bu sənəd Rusiya Federasiyası nümayəndələri ilə də müzakirə oluna bilər".
Zelenskinin açıqlamasına görə, Ukrayna yalnız bu model üzrə danışıqlara hazırdır. O, bir daha vurğulayıb ki, Ukraynanın maraqları əsas götürülməyən heç bir sənəd müzakirəyə açıq deyil.
Aybəniz Səfərova
01:45 23.04.2025
Oxunuş sayı: 12520
