İsrail ordusu Qəzzada son yaşam ümidini də bombaladı
İsrail ordusu Qəzzanın şimalında yerləşən Cibaliya ən-Nazle bölgəsində bələdiyyə binasına və humanitar məqsədlər üçün istifadə edilən 9 ədəd ağır tikinti texnikasına hava zərbələri endirib.
Crossmedia.az Fələstin mediasına istinadən xəbər verir ki, Qəzza Mülki Müdafiə Müdirliyinin yaydığı məlumata görə, məhv edilən texnika dağıntıların təmizlənməsi, yaralı və cəsədlərin çıxarılması, yolların açılması və sığınacaqların tikintisi üçün istifadə olunurdu.
Mülki Müdafiə rəsmisi Məhəmməd əl-Muğayyer bildirib ki, beş Caterpillar 950B, üç Caterpillar 950E və bir Caterpillar 972 buldozeri Misir-Qətər komitəsi tərəfindən bölgəyə gətirilib və koordinatları əvvəlcədən beynəlxalq tərəfdaşlarla bölüşülüb.
Bombardman nəticəsində bələdiyyə binasında yanğın baş verib. Rəsmilər bildirirlər ki, İsrail ordusu yanğının söndürülməsinə gələn təcili yardım və mülki müdafiə qruplarının əraziyə daxil olmasına da mane olub. Hadisə zamanı bələdiyyə işçiləri və mülki şəxslər əl ilə yanğını söndürməyə çalışıblar.
Qəzza rəsmiləri bu hücumu beynəlxalq humanitar hüququn pozulması kimi qiymətləndirərək, İsrailin bölgədə humanitar fəaliyyətləri məqsədyönlü şəkildə hədəfə aldığını vurğulayıblar.
Qeyd edək ki, ötən gün İsrailin Qəzzanın mərkəzində yerləşən Nusayrat Qaçqınlar Düşərgəsindəki şorbaxananı vurması nəticəsində 5 fələstinli həyatını itirib.
Aybəniz Səfərova
23:46 22.04.2025
Oxunuş sayı: 1724
