HƏMAS atəşkəs təklifini Tramp administrasiyasına çatdırmaq üçün Türkiyədən yardım istəyib
Ərəb mediasında yer alan xəbərə görə, İsrailin Qəzzaya hücumlarının davam etdiyi bir vaxtda, Türkiyədə yüksək səviyyəli görüşlər keçirən HƏMAS heyəti, yeni atəşkəs planının ABŞ Prezidenti Donald Tramp rəhbərliyinə çatdırılması üçün Türkiyədən dəstək istəyib.
Crossmedia.az xarici mediaya istinadən xəbər verir ki, “Şarku’l Avsat” qəzetinə danışan iki mənbə, HƏMAS-ın Qəzzada atəşkəs təşəbbüsü çərçivəsində Tramp administrasiyasına müraciət etməyi planlaşdırdığını və bunun üçün Ankaranın Vaşinqtonla olan yaxşı əlaqələrindən istifadə etməsini istədiyini bildirib.
Mənbələrə görə, HƏMAS tərəfindən təklif edilən “ətraflı razılaşma” çərçivəsində, razılaşdırılmış sayda fələstinli məhbusun azadlığa buraxılması müqabilində bütün israilli girovların sərbəst buraxılması, müharibənin dayandırılması və İsrailin Qəzzanın bütün bölgələrindən çəkilməsi nəzərdə tutulur.
HƏMAS rəhbərliyi 19 aprel tarixində Türkiyənin xarici işlər naziri Hakan Fidan və Milli İstihbarat Təşkilatının rəhbəri İbrahim Kalınla görüşüb. Görüşlərdə HƏMAS Şura Məclisinin sədri Məhəmməd Dərviş və Siyasi büro üzvləri də iştirak edib.
Qəzetə danışan mənbələrdən biri, HƏMAS-ın bu addımının, ABŞ-nin Girovlarla iş üzrə xüsusi nümayəndəsi Adam Bohlerin “bütün israilli girovlar azad olunarsa, müharibə dayanacaq” bəyanatına əsaslandığını, lakin İsrailin bu təşəbbüsə rədd cavabı verdiyini bildirib. Digər mənbə isə HƏMAS-ın Türkiyədəki görüşlərlə, Ankaranın Vaşinqtonla olan münasibətlərindən istifadə edərək bu təşəbbüsü Tramp administrasiyasına çatdırmaq niyyətində olduğunu qeyd edib.
Mədinə Cəlilova
21:25 22.04.2025
Oxunuş sayı: 10925
