Papa Fransiskusun vəsiyyəti və dəfn mərasiminin detalları açıqlandı
Katoliklərin ruhani lideri və Vatikan Dövlət Başçısı Papa Fransiskusun vəsiyyətnaməsi və dəfn mərasimi ilə bağlı detallar açıqlanıb.
Crossmedia.az xarici KİV-ə istinadən xəbər verir ki, dünən səhər vəfat edən Papa Fransiskusun ölümündən sonra Vatikan qanunvericiliyinə uyğun olaraq prosedur işə salınıb. Papa şəxsən istifadə etdiyi otaqlarda Papalığın müvəqqəti idarəçisi (Kamerlengo) Kardinal Kevin Farrellin nəzarəti ilə möhürləmə prosesi həyata keçirilib və Papalığın rəsmi olaraq boş olduğu mənasını verən “Sede Vacante” dövrü başladılıb.
Vatikanın rəsmi yayım orqanı “Vatican News”məlumatına görə, dünən axşam saat 20:00-da Papa Fransiskusun ölüm bəyanatı yüksək səslə oxunub, nəşi tabuta yerləşdirilib. Papalığın rəmzi olan “balıqçı üzüyü” də kilsə qanunları çərçivəsində məhv edilib.
Bu gün səhər Kardinallar kollegiyası ilk toplantısını keçirəcək və bu toplantıda Papa Fransiskusun dəfn mərasiminin tarixi müəyyənləşdiriləcək.
Vatikanın verdiyi açıqlamaya görə, Papa Fransiskus vəsiyyətnaməsində Roma şəhərində, hər beynəlxalq səfəri öncəsi və sonrası dua etdiyi Santa Maria Maggiore (Azizə Böyük Məryəm) Bazilikasında dəfn olunmasını istədiyini bildirib.
Papa, məzarının sadə, torpaq altında və bəzəksiz olmasını, üzərində yalnız “Franciscus” yazısının yer almasını vəsiyyət edib.
Ötən axşam Vatikanın Müqəddəs Pyotr Meydanında Papa Fransiskusun xatirəsinə dua mərasimi təşkil olunub, iştirakçılar Papa üçün alqışlarla vida ediblər. İtaliya Mədəniyyət nazirliyi isə Roma simvollarından biri olan Kolizeyin işıqlarını Papa Fransiskusun xatirəsinə söndürdüyünü açıqlayıb.
Mədinə Cəlilova
20:26 22.04.2025
Oxunuş sayı: 6649
