Kreml: Putin Zelenskinin təklifini dəyərləndirməyə hazırdır
Kreml katibi Dmitri Peskov, Ukrayna Prezidenti Volodimir Zelenskiyin sivil infrastruktura qarşı hücumların qarşılıqlı şəkildə dayandırılması ilə bağlı təklifinə münasibət bildirib. O, Rusiyanın bu təşəbbüsü dəyərləndirməyə açıq olduğunu deyib.
Crossmedia.az Rusiya mətbuatına istinadən xəbər verir ki, Peskovun sözlərinə görə, bu məsələ Rusiya Prezidenti Vladimir Putinin danışıqlara hazır olduğunu göstərsə də, kompleks bir mövzudur və hazırda Rusiya ilə Ukrayna arasında konkret görüş planı yoxdur.
Zelenski 21 aprel tarixində etdiyi çıxışda, Ukraynanın sivil obyektlərə hücumların dayandırılması üçün istənilən dialoqa açıq olduğunu bildirib və Moskvadan dəqiq cavab gözlədiklərini vurğulayıb.
Peskov isə cavabında, bu təklifin Putin tərəfindən Pasxa münasibətilə elan olunan 30 günlük atəşkəs fonunda qiymətləndirilməli olduğunu bildirib. Həmin müddətdə hər iki tərəf qarşı tərəfi atəşkəsi pozmaqda ittiham etmişdi.
Peskov əlavə edib: “Əgər sivil infrastruktura aid obyektlərdən danışırıqsa, bu obyektlərin hansı hallarda hərbi hədəf ola biləcəyini və hansı hallarda olmadığını ayırd etmək lazımdır.”
Putin də dünənki açıqlamasında bildirib ki, əgər “düşmən” qüvvələr və hərbçilər bu obyektlərdə toplanırsa, həmin sivil obyektlər hərbi hədəfə çevrilə bilər. “Bu səbəbdən bu məsələdə nəzərə alınmalı nüanslar var,” – deyə Rusiya Prezidenti qeyd edib.
Sonda Peskov vurğulayıb ki, Ukrayna Rusiya ilə danışıqlar aparmaq istəyirsə, bu cür təmasların qarşısını alan hüquqi maneələri aradan qaldırmalıdır.
Mədinə Cəlilova
20:02 22.04.2025
Oxunuş sayı: 10351
