Ermənistan parlamentində dava: Hakimiyyət və müxalifət deputatları arasında gərginlik yaşanıb
Bu gün Ermənistan parlamentində hakim partiya ilə müxalifət deputatları arasında fiziki qarşıdurma baş verib.
Crossmedia.az xəbər verir ki, bu barədə yerli KİV məlumat yayıb.
Hadisə Milli Assambleyanın spikeri Alen Simonyanın “Ermənistan” fraksiyasında daxili münaqişə olduğu ilə bağlı səsləndirdiyi fikirdən sonra başlayıb. Onun sözlərinə görə, fraksiyanın partiyasız üzvləri “Daşnaksütyun” partiyasının təsiri altına düşüb.
Bu iddiaya dərhal etiraz edən “Ermənistan” fraksiyasının deputatı Qarnik Danielyan məsələni müzakirəyə çıxarıb. Ardınca digər müxalif deputatlar da mübahisəyə qoşulub. Yayılmış görüntülərdə müxalifətçi Geqam Manukyanla hakim “Vətəndaş Müqaviləsi” fraksiyasının üzvü Vağe Qalumyan arasında yaşanan söz atışmasının davaya çevrildiyi görünür.
Qarşıdurma qısa müddətdə daha da alovlanıb. Xüsusilə “Vətəndaş Müqaviləsi”nin deputatları Aren Mkrtçyan və Narek Qriqoryanın fəallığı diqqət çəkib. Onları sakitləşdirməyə həmkarları cəhd edib.
Qeyd edək ki, bir neçə dəqiqə sonra Dövlət Mühafizə Xidmətinin əməkdaşları müdaxilə edərək dava edənləri ayırıblar. Ardınca spiker iclasa 20 dəqiqəlik fasilə elan edib.
Fatimə Məmmədova
16:30 22.04.2025
Oxunuş sayı: 9919
