İsrail Fələstin səfəri ərəfəsində fransız vəkillərin vizalarını ləğv etdi
İsrail, Fələstin ərazilərinə səfər etməyi planlaşdıran Fransa sol partiyalarına mənsub 27 millət vəkili, senator və yerli idarəçinin vizalarını səfərdən iki gün əvvəl ləğv edib.
Crossmedia.az “France 24” xəbər portalına istinadən xəbər verir ki, 20 aprel bazar günü İsrail və işğal altındakı Fələstin ərazilərinə səfər etməyi planlaşdıran nümayəndə heyətinə verilmiş vizalar ləğv olunub. İsrail Daxili İşlər Nazirliyi bu addımı “İsrail dövlətinə qarşı fəaliyyət göstərə biləcək şəxslərə qadağa tətbiq etmək səlahiyyəti verən qanuna” əsaslandırıb.
Vizası ləğv edilən 17 siyasətçi, Fransa Ekolojist və Kommunist partiyalarının üzvləri bu qərarı “toplu cəzalandırma” kimi qiymətləndirərək Fransa Prezidenti Emmanuel Makronu müdaxiləyə çağırıblar.
Siyasətçilər bildiriblər ki, Qüdsdəki Fransız konsulluğunun dəvəti ilə 5 günlük səfər planlaşdırılıb və bu səfər “beynəlxalq əməkdaşlıq və sülh mədəniyyətini gücləndirməyə” xidmət edirdi. Onların sözlərinə görə, vizalar bir ay əvvəl təsdiqlənsə də, səfərdən cəmi iki gün əvvəl ləğv edilib. Fransız nümayəndə heyəti bu qərarın səbəblərinin açıqlanmasını tələb edir.
Səfərdə iştirak etməli olan şəxslər arasında Ekolojist partiyasının millət vəkilləri Fransua Ruffin, Aleksis Korbiyer, Jüli Ozen, kommunist partiyasından Soumya Burua və senator Marian Marqate də yer alırdı. Heyətə həmçinin solçu bələdiyyə başçıları və yerli nümayəndələr daxil idi.
Mədinə Cəlilova
20:12 21.04.2025
Oxunuş sayı: 1150
