"Ərəb ölkələrinin İran-ABŞ danışıqlarına baxışı dəyişib" - NYT
ABŞ-ın nüfuzlu “The New York Times” qəzeti yazır ki, ərəb ölkələrinin, xüsusilə də Fars körfəzi dövlətlərinin İran ilə ABŞ arasında aparılan danışıqlara münasibəti son dövrlərdə dəyişib.
Crossmedia.az qəzetin məlumatına istinadən xəbər verir ki, Vaşinqtondakı Körfəz Ölkələri İnstitutunun baş elmi işçisi Kristin Smit-Devan bildirib ki, Səudiyyə Ərəbistanı artıq bu danışıqlara əvvəlki qədər neqativ yanaşmır:
“Obama dövründə səudiyyəlilər İranla ABŞ arasındakı yaxınlıqdan narahat idilər, çünki özlərini təcrid olunmuş hiss edirdilər. Tramp dövründə isə İranla gərginliyin artması onları birbaşa hədəfə çevrilmək qorxusu ilə üz-üzə qoymuşdu”, – deyə o vurğulayıb.
Avrasiya Qrupunun Yaxın Şərq Departamentinin direktoru Firas Moqsad isə qeyd edib ki, hazırda ərəb ölkələri üçün əsas prioritet regional sabitliyin qorunmasıdır.
“Chatham House” beynəlxalq beyin mərkəzinin Yaxın Şərq Proqramının direktoru Sənəm Vəkilin sözlərinə görə isə Körfəz ölkələri yalnız danışıqları dəstəkləmir, eyni zamanda təhlükəsizlik və iqtisadi sabitliyi pozacaq gərginliklərin qarşısını almağa çalışırlar.
20:40 20.04.2025
Oxunuş sayı: 9731
