Livan Prezidentindən Hizbullah şərhi: "Silahsızlaşdırma həssas məsələdir”
Livan Prezidenti Cozef Avn Hizbullahın silahsızlaşdırılmasının “həssas məsələ” olduğunu bildirib. Silahlanmanın dövlətin inhisarına verilməsinin vacibliyinə diqqət çəkən Avn, bu prosesin düzgün şərtlər altında həyata keçirilməli olduğunu vurğulayıb. O, tələsik və məcburi addımların ölkəni fəlakətə sürükləyə biləcəyi barədə xəbərdarlıq edib.
Crossmedia.az Livan mətbuatına istinadən xəbər verir ki, mətbuat nümayəndələrinə açıqlamasında Avn, silah daşımaq hüququnun yalnız dövlətə aid olduğunu qeyd edərək, bunun ölkədaxili sülhün qorunması üçün zəruri olan həssas və məsuliyyət tələb edən bir məsələ olduğunu söyləyib. Prezident, silahlanma məsələsində dövlət inhisarını tətbiq etmək niyyətində olduqlarını, lakin bunun üçün uyğun şərtlərin formalaşmasını gözlədiklərini bildirib.
Avn əlavə edib ki, Livandakı bütün mübahisəli daxili məsələlərə yalnız dialoq və qarşıdurmasız ünsiyyət yolu ilə yanaşmaq mümkündür. Əks halda, ölkənin fəlakətə sürüklənəcəyini deyib.
Digər tərəfdən, Hizbullahın baş katibi Naim Qasim ötən cümə günü verdiyi açıqlamada, heç kimin Hizbullahı silahsızlaşdıra bilməyəcəyini bildirib. O, təşkilatın müdafiə strategiyası ilə bağlı dialoqa açıq olduğunu, lakin bu dialoqun İsrailin təzyiqləri altında aparıla bilməyəcəyini qeyd edib.
İsrail ordusunun Livanın cənubuna endirdiyi hava zərbəsində bir nəfər həyatını itirib, bir nəfər isə yaralanıb. Livan səhiyyə nazirliyi, İsrailin pilotsuz uçuş aparatı ilə Sayda şəhərinə bağlı Kevsəriyyə əs-Seyyad qəsəbəsində bir avtomobili vurduğunu bildirib.
Livanın rəsmi xəbər agentliyi NNA, İsrailin döyüş təyyarələri və PUA-larının cənub bölgələrində intensiv uçuşlar etdiyini xəbər verib. 27 noyabr 2024-cü ildə əldə edilən atəşkəsə baxmayaraq, İsrail bu razılaşmanı tez-tez pozur. Atəşkəsdən sonra həyata keçirilən hücumlarda 190-dan çox insan həlak olub, 485 nəfər yaralanıb.
Mədinə Cəlilova
20:00 20.04.2025
Oxunuş sayı: 834
