Çində qeyri-nüvə hidrogen bombası sınaqdan keçirildi
Çin alimləri nüvə materiallarından istifadə etmədən hidrogen əsasında hazırlanmış partlayıcı qurğunu uğurla sınaqdan keçiriblər. Tədqiqatda qeyd olunur ki, bu texnologiya ənənəvi nüvə silahlarından fərqli olaraq daha təmiz və təhlükəsiz enerji mənbəyinə əsaslanır.
Crossmedia.az xarici mediaya istinadən bildirir ki, bu qurğu Çin Dövlət Gəmiqayırma Korporasiyasının (CSSC) tərkibində fəaliyyət göstərən 705-ci Elmi-Tədqiqat İnstitutu tərəfindən hazırlanıb. Həmin institut eyni zamanda sualtı silahların istehsalı ilə də məşğuldur.
Məlumata görə, sınaq zamanı 2 kq-lıq maqnezium hidrid əsaslı qurğu 1000°C-dən yüksək istilik yaradıb və alovlanma müddəti 2 saniyədən çox davam edib. Bu göstərici adi TNT partlayıcısından təxminən 15 dəfə artıqdır. Hidrogenin sürətli termal parçalanması nəticəsində əldə edilən güclü partlayış, gələcəkdə yüksək dəqiqlikli silah sistemlərində, xüsusilə də sualtı və strateji hərbi texnologiyalarda tətbiq edilə bilər.
Ekspertlərə görə, bu inkişaf Çin Xalq Azadlıq Ordusunun daha təmiz enerji həllərinə yönəldiyini və bölgədə – xüsusilə Cənubi Çin dənizində – texnoloji üstünlük qazanmağa çalışdığını göstərir. ABŞ-ın Tayvana artan müdafiə dəstəyi fonunda bu cür silah texnologiyalarının inkişafı geosiyasi baxımdan da diqqət çəkir.
Zəhra Ağayeva
17:50 20.04.2025
Oxunuş sayı: 11639
