Ukrayna və Rusiya arasında atəşkəs qarşıdurması davam edir
Rusiya, Ukraynanın “Pasxa atəşkəsini” min dəfədən çox pozduğunu iddia edib. Ukrayna isə cəbhə xəttində fəaliyyətin azaldığını, lakin döyüşlərin tamamilə dayanmadığını bildirib.
Crossmedia.az xarici mətbuata istinadən xəbər verir ki, Rusiyanın 19 aprel saat 18:00-dan 21 aprel saat 00:00-a qədər qüvvədə olacaq şəkildə elan etdiyi Pasxa atəşkəsi ilə bağlı qeyri-müəyyənlik davam edir.
Ukrayna Prezidenti Volodimir Zelenski, sosial media hesabında verdiyi açıqlamada, “Rus ordusu sanki atəşkəs varmış kimi davranmağa çalışır. Pasxa səhəri etibarilə ümumi bir atəşkəs görüntüsü yaratmaq istəyirlər, amma bəzi bölgələrdə irəliləməyə və Ukraynaya itkilər verdirməyə yönəlmiş lokal cəhdlərindən əl çəkməyiblər”,– deyə bildirib.
Zelenskinin sözlərinə görə, Ukrayna qüvvələri cəbhə xətti boyunca 59 atəş və bombardman halı ilə yanaşı, beş hücum cəhdini qeydə alıb.
Ukrayna ordusunun şərq cəbhəsi sözçüsü Viktor Trehubov da fəaliyyətin azaldığını, lakin qarşıdurmanın tam dayanmadığını bildirib: “Azalma müşahidə olunur, amma tam dayanmayıb. Açığı, tam dayanacağına çox ümidimiz də yoxdur.”
Rusiya mətbuatında yayılan xəbərlərə görə isə Ukraynanın bu səhər Donetsk bölgəsində hücuma keçdiyi bildirilir. Rusiya nəzarətindəki Donetsk şəhərində ən az üç partlayışın baş verdiyi qeyd olunub. TASS agentliyinə danışan bir mənbə, Ukrayna ordusunun Budennovski rayonunda yerləşən Elevatornaya küçəsi yaxınlığında hücum təşkil etdiyini bildirib. Hadisəyə dair detalların araşdırıldığı qeyd edilib.
Donetskdəki Rusiya təyinli rəhbərlik isə Gorlovka bölgəsinin də hücuma məruz qaldığını, şəhərə dörd dəfə atəş açıldığını açıqlayıb.
Rusiya müdafiə mazirliyi isə gün ərzində verdiyi bəyanatda, Ukraynanın Prezident Vladimir Putin tərəfindən elan edilən “Pasxa atəşkəsini” min dəfədən çox pozduğunu iddia edib. Interfax agentliyinin məlumatına görə, Ukrayna qüvvələri Rusiyanın mövqelərinə 444 dəfə atəş açıb, 900-dən çox pilotsuz uçuş aparatı (PUA) göndərib.
Nazirlik, sərhəddəki Bryansk, Kursk və Belqorod bölgələrinə hücumlar təşkil edildiyini, nəticədə mülki şəxslərin həlak olduğunu və yaralandığını, mülki obyektlərin də zərər gördüyünü açıqlayıb.
Bəyanatda əlavə olunub ki, Rusiya qüvvələri atəşkəs elanından əvvəl Ukraynanın şərqində yerləşən Novomixaylivkanı nəzarətə götürüb.
Mədinə Cəlilova
16:54 20.04.2025
Oxunuş sayı: 11649
