Livan Prezidenti müharibə istəmədiklərini deyib
Livan Prezidenti Cozef Aun xalqın müharibə istəmədiyini və ölkənin suverenliyi ilə müstəqilliyinə cavabdeh yeganə gücün Livan Silahlı Qüvvələri olduğunu bildirib.
Crossmedia.az xəbər verir ki, prezident bu fikirləri Pasxa bayramı münasibətilə Livanın Maronit Patriarxı Mar Beşara Butrus Əl-Rai ilə görüşü zamanı səsləndirib.
Aun görüşdən sonra mediaya açıqlamasında Hizbullahın silahsızlaşdırılması məsələsinə toxunub. O, bu cür həssas mövzuların mətbuat və sosial media vasitəsilə deyil, müvafiq tərəflərlə sakit şəkildə müzakirə edilməsinin vacibliyini vurğulayıb:
“Düşünürəm ki, livanlılar müharibə istəmir, hətta bu barədə eşitmək belə istəmirlər. Livanın suverenliyi və müstəqilliyinə cavabdeh yeganə qüvvə Livan Silahlı Qüvvələridir”.
Aun əlavə edib ki, silahların dövlət nəzarətinə keçməsi ilə bağlı məsələni uzaqgörənlik və məsuliyyətlə həll etməyə çalışacaq:
“Hökumətlə əməkdaşlıq edərək bu məsuliyyəti öz üzərimə götürəcəyəm. Livanda daxili fikir ayrılıqları yalnız konsensus yolu ilə həll oluna bilər. Silah üzərində dövlət inhisarını təmin edəcəyik, lakin bunun necə həyata keçiriləcəyini müəyyənləşdirmək üçün uyğun şərtlərin formalaşmasını gözləyəcəyik”.
Prezident, andiçmə mərasimində də bu mövzuya toxunduğunu xatırladaraq, həmin mövqedə qaldığını təsdiqləyib.
Digər tərəfdən, Hizbullahın baş katibi Naim Qasem aprelin 18-də televiziya ilə çıxışında İsrailin Livana qarşı hücumlarına toxunaraq, təşkilatın silahlarının təhvil verilməsinə qarşı çıxıb.
Beləliklə, Livanda silah üzərində dövlət inhisarı və Hizbullahın mövqeyi məsələsi siyasi gündəmin əsas mövzularından biri olaraq qalır.
16:40 20.04.2025
Oxunuş sayı: 12134
