SDF ABŞ-nin bölgədən çəkilməsi fonunda Əl-Hol düşərgəsində əməliyyata hazırlaşır
Suriyanın şimal-şərqində, Hasekə əyalətində yerləşən Əl-Hol qaçqın düşərgəsində yaxın günlərdə genişmiqyaslı “antiterror əməliyyatı” keçiriləcəyi gözlənilir. Əməliyyatı ABŞ tərəfindən dəstəklənən və əsasən kürd qüvvələrindən ibarət olan Suriya Demokratik Qüvvələri (SDF) həyata keçirmək niyyətindədir.
Crossmedia.az xəbər verir ki, mənbələrin bildirdiyinə görə, bu addım ABŞ-nin bölgədəki hərbi kontingentini azaltmağa başlaması fonunda atılır. Əl-Hol düşərgəsi illərdir ki, İŞİD-lə əlaqəli şəxslərin və onların ailə üzvlərinin saxlanıldığı kritik bir nöqtə hesab olunur. Təhlükəsizlik baxımından həssas olan bu bölgədə vəziyyət tez-tez nəzarətdən çıxır.
Müşahidəçilər hesab edirlər ki, SDF bu cür əməliyyatlarla Vaşinqtona açıq mesaj verməyə çalışır: ABŞ bölgədən çəkilərsə, həm düşərgədə, həm də geniş mənada regionda sabitlik pozula bilər. Beləliklə, SDF ABŞ-ın dəstəyini qorumaq üçün “təhlükəsizlik zəmanəti” rolunu ön plana çıxarır.
Qeyd edək ki, SDF bundan əvvəl də oxşar əməliyyatlar həyata keçirib və bu halların çoxu ABŞ-nin bölgəyə dair qərarlarına təsir göstərmək məqsədi daşıyıb. Ekspertlər bu tendensiyanı siyasi rıçaq kimi qiymətləndirirlər.
Mədinə Cəlilova
12:25 19.04.2025
Oxunuş sayı: 5760
