Beynəlxalq Ədalət Məhkəməsi İsrailə qarşı soyqırımı ittihamı üzrə baxışı 6 ay təxirə saldı
Haaqada yerləşən Beynəlxalq Ədalət Məhkəməsi Cənubi Afrika Respublikasının İsrailə qarşı qaldırdığı soyqırımı iddiası üzrə əsas məhkəmə baxışını 6 ay müddətinə təxirə salıb.
Crossmedia.az xəbər verir ki, qərara əsasən, İsrailə öz müdafiəsini təqdim etmək üçün əlavə vaxt verilib.
Məhkəmənin açıqlamasına görə, bu müddət ərzində İsrail tərəfi iddialara dair ətraflı cavab hazırlamalıdır. Məhkəmə həmçinin qeyd edib ki, bu təxirəsalma prosedur xarakterlidir və işin mahiyyətinə dair qərar verilməyib.
Xatırladaq ki, Cənubi Afrika Respublikası 2023-cü ilin sonunda İsraili Fələstin ərazisində, xüsusilə Qəzza zolağında soyqırımı törətməkdə ittiham edərək Beynəlxalq Ədalət Məhkəməsinə müraciət etmişdi. İsrail isə bu iddiaları rədd edir və hərbi əməliyyatların özünümüdafiə xarakteri daşıdığını bildirir.
Mədinə Cəlilova
12:00 19.04.2025
Oxunuş sayı: 10601
