Tramp: “ABŞ demək olar ki, dünyanın hər ölkəsi tərəfindən soyulub”
ABŞ Prezidenti Donald Tramp, İtaliyanın Baş naziri Giorgia Meloni ilə Ağ Evdə görüş keçirib. Tərəflər ABŞ-nin gömrük rüsumları qərarlarını və ticarət münasibətlərini müzakirə ediblər.
Crossmedia.az ABŞ mətbuatına istinadən xəbər verir ki, görüş öncəsi jurnalistlərin suallarını cavablandıran Tramp, ABŞ ilə Avropa İttifaqı arasında ticarət razılaşması imzalanmaması ehtimalına münasibət bildirərək, “Yüz faiz ticarət razılaşması olacaq” deyib. O, “Ədalətli bir razılaşma olacaq, bunu gözləyirəm” sözləri ilə də vurğulayıb ki, ABŞ maraqlarını qoruyan bir ticarət siyasəti yürütməyə davam edəcək.
Tramp, “ABŞ demək olar ki, dünyanın hər ölkəsi tərəfindən soyuldu, istismar edildi. Artıq belə olmayacaq. Ədalətli razılaşmalar imzalayacağıq” deyə bəyan edib. O, İtaliya və Yaponiya ilə aparılan ticarət danışıqlarının müsbət yöndə irəlilədiyini də bildirib.
Çin ilə bağlı gömrük tariflərinə də toxunan Tramp, “Məndən əvvəl heç bir prezident Çindən bir qəpik belə almadı. Biz isə bu günə qədər 700 milyard dollar qazandıq. Avropa, Meksika və Kanada kimi ölkələrə də fentanil və zəif sərhədlər səbəbilə cəzalar tətbiq etdik. Hazırda milyardlarla dollar gəlir əldə edirik” deyə qeyd edib.
Rusiya–Ukrayna müharibəsinə dair açıqlamasında isə Tramp, əvvəlki prezident Joe Biden administrasiyasını “zəif və gecikmiş” addımlar atmaqda ittiham edib. “Əgər prezident mən olsaydım, bu müharibə heç başlamazdı. Putinlə dəfələrlə bu məsələni müzakirə etmişdim” deyə bildirib.
Tramp, Ukraynada hər həftə təxminən 2 min 500 nəfərin öldüyünü deyərək, itkilərin qarşısının alınmasının vacibliyini vurğulayıb.
ABŞ və Ukrayna arasında 24 aprel tarixində dəyərli minerallar üzrə razılaşmanın imzalanacağını açıqlayan Tramp, bu sazişin iki ölkə arasında iqtisadi əlaqələri və qarşılıqlı inamı gücləndirəcəyini bildirib. O, həmçinin bu razılaşmanın mümkün sülh təşəbbüslərinə də zəmin yarada biləcəyini deyib.
Avropadakı qeyri-qanuni miqrasiya siyasətlərinə də toxunan Tramp, qitənin miqrasiya siyasətini “fəlakət” olaraq dəyərləndirib.
Mədinə Cəlilova
21:22 18.04.2025
Oxunuş sayı: 7055
