COP29 QHT Koalisiyası fəaliyyətini yeni formada davam etdirəcək
2025-ci il aprelin 15-də 100-ə yaxın ölkədən 500-dən çox QHT-ni birləşdirən COP29 QHT Koalisiyası “Qlobal Cənub QHT Platformasının təsisatlandırılması” mövzusunda hibrid görüş keçirib.
Crossmedia.az-ın məlumatına görə, görüşdə Azərbaycanın COP29-a uğurla sədrliyinin mühüm COP mirası yaratdığı, 2024-cü ilin noyabrında COP29 zamanı “Bakı dönüşü”nün əldə edilməsinin tarixi hadisə olması xüsusi qeyd edilib. O da xatırladılıb ki, 120 ölkəni birləşdirən Qoşulmama Hərəkatına 2019-2023-cü illərdə sədrliyi dövründə də Azərbaycan mühüm qlobal təşəbbüslərə imza atıb, vaksin millətçiliyinə qarşı çıxıb.
COP29 QHT Koalisiyasına üzv QHT-lər 2024-cü il noyabrın 15-də COP29 çərçivəsində Qoşulmama Hərəkatı regionu QHT-lərin “Cənub-Cənub əməkdaşlığı vasitəsilə iqlim fəaliyyətinin inkişafı: QHT-lərin rolu” adlı beynəlxalq konfransının mühüm nəticələri olduğunu qeyd ediblər. Həmin konfransın yekunu olaraq, dünya ölkələrinin 71%-ni əhatə edən regionlardan vətəndaş cəmiyyəti təsisatlarının - 137 ölkədən 1023 QHT təmsilçisi, ictimai fəalın birgə bəyanatı ilə Qlobal Cənub QHT Platformasının yaradılmasının vaxtının çatdığı elan olunub.
Filippinin “Earthsavers Dreams Ensemble” təşkilatının rəhbəri Sesil Qvidot-Alvares (Cecile Guidote-Alvarez), Nigeriyanın “Afrihealth Optonet Association” (AHOA) təşkilatının rəhbəri Uzodinma Adiredje (Uzodinma Adireje), Pakistanın iqlim fəalları - iqlim səfirləri Adnan Ullah (Adnan Ullah), Kayser Navab (Qaiser Nawab), PACJA – Pan-Afrika İqlim Ədaləti Alyansının İctimai vəkillik və kommunikasiya departamentinin rəhbəri Filipp Kilonzo (Philip Kilonzo) və digər xarici QHT təmsilçiləri COP29 QHT Koalisiyasının ümumi rəyi kimi Azərbaycanın Qlobal Cənub QHT Platformasına evsahibliyi etməsini təklif ediblər, onlar Azərbaycan Milli QHT Forumundan Qlobal Cənub QHT Platformasının təsis konfransı üçün işlərin sürətləndirilməsini xahiş ediblər.
Müzakirələrin yekununda qərara gəlinib ki, COP29 QHT Koalisiyası üzvlərinin 84%-i ən az inkişaf etmiş və inkişaf etməkdə olan ölkələrin vətəndaş cəmiyyətini təmsil etdiyindən bu şəbəkə artıq yeni müstəviyə çıxmalıdır. Azərbaycanın qlobal təşəbbüslərinin davam etdirilməsinə böyük ehtiyac olması, həmçinin COP29-a sədrliyinin başa çatmasına az qaldığı nəzərə alınmaqla, COP29 QHT Koalisiyasının Qlobal Cənub QHT Platformasına tranformasiya edilməsi barədə ümumi razılığa gəlinib.
Toplantıda Azərbaycan QHT-lərinin flaqmanı olan Azərbaycan Milli QHT Forumuna Qlobal Cənub QHT Platformasının təsisatlandırılması işində ardıcıl səyləri və prosesdə gərgin fəaliyyəti üçün minnətdarlıq edilib.
Azərbaycan Milli QHT Forumunun İdarə Heyətinin sədri Ramil İskəndərli məlumat verib ki, COP29 QHT Koalisiyası ötən ilin sonunda Qlobal Cənub QHT Platformasının təsisatlandırılması üçün məsələ qaldırdıqdan sonra prosesə başlanılıb və 2025-ci il aprelin 28-29-da Bakıda Qlobal Cənub QHT Platformasının təsis konfransının keçirilməsi üçün hazırlıq işləri artıq tamamlanmaq üzrədir. O, müzakirələrin Bakıda davam etdirilməsini səbirsizliklə gözlədiklərini diqqətə çatdırıb.
Qeyd edək ki, aprelin 28-29-da COP29 dövründə başlanmış prosesin məntiqi nəticəsi olaraq, Qlobal Cənubun aparıcı QHT-ləri Azərbaycan Milli QHT Forumunun təşkilatçılığı ilə Qlobal Cənub QHT Platformasının təsis konfransı üçün Bakıya toplaşacaq. 2 gün davam edəcək mötəbər tədbirdə yeni və ədalətli dünya nizamı üçün Qlobal Cənub QHT-ləri birgə müzakirələr aparacaq, üzləşdikləri çətinlikləri və çağırışları dilə gətirəcək, mühüm mesajlar verəcəklər.
Beləliklə, Azərbaycan Qlobal Şimal və Qlobal Cənub arasında daha bir vasitəçi, körpü rolunu oynayacaq.
Bu tədbir Azərbaycan vətəndaş cəmiyyətinin həyatında da əlamətdar hadisə olacaq. Azərbaycan QHT-ləri Qlobal Cənub regionu ölkələrinin QHT-ləri ilə yeni təmaslar quracaq, əməkdaşlığı daha da dərinləşdirəcək.
12:38 16.04.2025
Oxunuş sayı: 753
