ABŞ və Britaniya “əla ticarət razılaşması”na yaxınlaşır
ABŞ və Böyük Britaniya arasında “əla ticarət razılaşması” imzalanması mümkündür.
Crossmedia.az xarici KİV-ə istinadən xəbər verir ki,bu barədə ABŞ vitse-prezidenti Cey Di Vens bildirib.
Onun sözlərinə görə, prezident Donald Trampın Böyük Britaniyaya və kral ailəsinə olan simpatiyası belə bir razılaşmanın əldə olunmasında mühüm rol oynaya bilər.
"Prezident Birləşmiş Krallığı doğrudan da sevir. O, kraliçanı sevirdi, krala isə heyrandır və onu da sevir. Bu, çox önəmli münasibətdir", – deyə Vens vurğulayıb.
Vitse-prezident əlavə edib ki, ABŞ administrasiyası hazırda baş nazir Kir Starmerin hökuməti ilə ticarət sazişi üzərində yaxından işləyir.
"Tramp biznesmendir və onun Britaniyada bir sıra mühüm kommersiya əlaqələri var. Amma düşünürəm ki, məsələ təkcə bununla bitmir. Aramızda dərin mədəni yaxınlıq da mövcuddur. Axı, ABŞ da ingilisdilli ölkədir", – deyə Vens qeyd edib.
O, hər iki tərəf üçün faydalı olacaq “əla bir razılaşmanın əldə olunması üçün yaxşı imkanların” olduğunu bildirib.
Fatimə Məmmədova
21:25 15.04.2025
Oxunuş sayı: 8299
