Ticarət müharibəsində yeni cəbhə: Çin şirkətlərə Boeing təyyarələri almamağı tapşırdı
Pekin ABŞ-Çin gərginliyində Boeing-ə qarşı addım atdı
ABŞ və Çin arasında davam edən ticarət gərginliyi fonunda Pekin rəhbərliyinin ölkədəki hava yolu şirkətlərinə Boeing-dən əlavə təyyarə almamağı tapşırdığı iddia olunub.
Crossmedia.az “Bloomberg” istinadən xəbər verir ki, Çin, ABŞ Prezidenti Donald Trampın Çin məhsullarına tətbiq etdiyi 145%-lik gömrük rüsumuna cavab olaraq belə bir qərar verib.
Məlumata görə, Pekin eyni zamanda hava yolu şirkətlərindən ABŞ istehsalı olan təyyarə hissələri və avadanlıqlarının da alınmamasını istəyib. Bu addımın ölkədəki təyyarələrin texniki baxım xərclərini artıracağı gözlənilir.
Xəbərin yayımlanmasının ardından ABŞ-nin havacılıq nəhəngi Boeing-in səhmləri 3% dəyər itirib, rəqibi olan Avropa istehsalçısı Airbus-ın səhmləri isə 1% artıb.
Boeing 1916-cı ildə ABŞ-də, Airbus isə 1970-ci ildə Fransada yaradılıb.
Çinin ən böyük üç hava yolu şirkəti “Çin hava yolları”, “Çin Şərq hava yolları” və “Çin Cənub hava yolları” 2025–2027-ci illər arasında müvafiq olaraq 45, 53 və 81 Boeing təyyarəsi təhvil almalı idi.
Çin hökumətinin ABŞ istehsalı olan təyyarələri lizinqə götürən və yüksək xərclərlə üzləşən şirkətlərə maliyyə dəstəyi göstərməyin yollarını da müzakirə etdiyi bildirilir.
Qeyd edək ki, Boeing-in 737 MAX model təyyarələrinin 2018 və 2019-cu illərdə baş verən qəzalarda 350-yə yaxın insanın həyatını itirməsindən sonra Çin bu modeli istifadədən çıxaran ilk ölkə olmuşdu. Çin, 2019-cu ildə həmçinin bu təyyarəyə verilmiş sifarişləri və təhvil prosesini dayandırmışdı.
Mədinə Cəlilova
20:14 15.04.2025
Oxunuş sayı: 8393
