Babacanyan: Paşinyanın bacarığı olsaydı, Köçəryan və Sarkisyan həbsdə olardı
"Ermənistan hökuməti sabiq prezidentlər Serj Sarkisyan və Robert Köçəryanı törətdikləri cinayətlərə görə cəzalandırmalıdır".
Crossmedia.az "Teleqraf" istinadla xəbər verir ki, bunu Ermənistanın müxalif “Respublika Naminə” partiyasının sədri Arman Babacanyan deyib.
Onun sözlərinə görə, Sərkisyanın hakimiyyəti dövründə Ermənistan sistemli talanlara məruz qalıb, ölkədə oliqarxik və avtoritar siyasi sistem formalaşıb:
“Adı korrupsiya və seçki saxtakarlığında hallanıb, siyasi həbslər həyata keçirib, öz xalqına zülmün simvoluna çevrilib. O adam ki, illər ərzində ölkəni oliqarx klanların mülkiyyətinə çevirmişdi. Hakimiyyəti dövründə yüzlərlə əsgər dinc şəraitdə ölüb, adı ölkənin qanlı səhifələrində keçir. Xalqın seçimini, xalqın hakimiyyətini, xalqın gələcəyini oğurlayan adam bu gün restoranlarda yeyib-içməməli, məhkəmə zalında dayanmalıdır. Hiylə ilə hakimiyyəti əlində saxlayan, xalqı və opponentlərini zorakılıqla susduran, seçki sisteminə inamı məhv edən bu adam ölkəni feodal üsullarla idarə edirdi.
Bu adamın ancaq oğurladığı milyardlarla dollarının mənşəyi haqqında danışmaq hüququ ola bilər. Açıqlamalıdır ki, bu ölkənin büdcəsi hara gedib, niyə onun hakimiyyəti dövründə insanlar kasıblaşıb, yaxınları isə varlanıb. Yaratdığı şikəst, qeyri-bərabər, talançılıq və korrupsiya mənbəyinə çevrilən orduda xidmət edən və bütün bunlara görə bu gün də vətənə qayıtmayan o əsgərlərin taleyinə cavab verməlidir.
Bu adın siyasətdə görünməyə haqqı yoxdur. Serj Sarkisyanın adı siyasi gündəmdə yox, cinayət işinin materiallarında hallanmalıdır. Onun siyasi həyatda olması hər bir vətəndaş üçün təhqirdir. Gecə Gömrük İttifaqına daxil olan, gündüz Avropa İttifaqı ilə danışıqlar aparan, xarici siyasəti şəxsi rifah vasitəsinə çevirən adam milli maraqdan danışa bilməz. Serj Sarkisyan hakimiyyət dəyişikliyindən yox, yaxın illərdə onu gözləyən hüquqi-siyasi qiymətdən danışmalı idi”.
Babacanyan əlavə edib ki, erməni xalqı artıq onu mühakimə edərək, hakimiyyətdən uzaqlaşdırıb:
“Amma ən ağrılısı budur ki, Sarkisyan da Köçəryan kimi yalnız ona görə cəzadan yayına bilir ki, Nikol Paşinyanın həmin işi dövlət işinə çevirmək iradəsi və bacarığı yoxdur. Paşinyan qarətdən danışdı, amma oğurlananları qaytarmadı, ədalətdən danışdı, amma yaralı məhkəmə sistemini sağaltmadı”.
Siyasətçi vurğulayıb ki, Sarkisyan və Köçəryanın cəzalandırılması milli gündəliyə çevrilməlidir:
“İntiqam yox, ciddi siyasi və hüquqi cavabdehlik gündəmi olmalıdır. Serj Sarkisyan, eləcə də Robert Köçəryan təkcə etdiklərinə görə deyil, həm də bacarmadıqlarına, xalqı məhrum etdiklərinə görə məsuliyyət daşımalıdır. Bu, dövlət, qanun və həqiqət məsələsidir.
Serj Sarkisyanın siyasətə qayıtmağa haqqı yoxdur. Onun yeri həm hüquqi, həm də mənəvi cəhətdən dövlətə qarşı törədilən cinayətlərə görə məsuliyyət daşıyanların dayandıqları yer (həbsxana) olmalıdır”.
20:00 15.04.2025
Oxunuş sayı: 7517
