Kral Arthura aid 13-cü əsr əlyazması tapıldı
Cambridge Universiteti nadir tarixi sənədi aşkara çıxardı
Cambridge Universitetində Kral Arthur əfsanəsinə aid 13-cü əsrdən qalma nadir əlyazma sənədi tapılıb. Universitet 25 mart tarixində sənədi ictimaiyyətə təqdim edib.
Crossmedia.az xəbər verir ki, tədqiqatçılara görə, bu sənəd “Suite Vulgate du Merlin” adlı əsərin bir hissəsidir və Kral Arthur hekayələrinin qədim fransız dilində yazılmış versiyasını əhatə edir.
Əlyazma 2019-cu ildə Cambridge-dəki kitabxanalardan birində, köhnə bir kitabın cild hissəsində təsadüfən aşkarlanıb. Məlumata görə, 1500-cü illərdə bu sənəd mülkiyyət qeydlərinin cildi üçün kəsilib, qatlanıb, tikilib və zədələnmiş vəziyyətdə saxlanılıb.
Müasir texnologiyalar sayəsində alimlər əlyazmanın mətnini zədələmədən rəqəmsal formatda bərpa edə biliblər. Çoxzolaqlı görüntüləmə, kompüter tomoqrafiyası və 3D modelləmə üsulları ilə mətnlər birləşdirilərək rəqəmsal bir “pazl” şəklində yenidən qurulub.
Tədqiqatı aparan mütəxəssislər əlyazmanın 1275–1315-ci illər arasında yazıldığını və dövrün zadəgan təbəqəsi üçün nəzərdə tutulduğunu bildiriblər.
Universitet yetkililəri hər əlyazmanın əllə çoxaldıldığı üçün unikal olduğunu və bu cür detallı məlumatların sənədlərin mənşəyini araşdırmaq baxımından əhəmiyyətli olduğunu qeyd ediblər.
Hazırda əlyazma Cambridge Universitetinin Kitabxanasında qorunur və rəqəmsallaşdırıldıqdan sonra tədqiqatçılara açıq olacaq.
Mədinə Cəlilova
19:30 15.04.2025
Oxunuş sayı: 9795
