Əlcəzair-Fransa münasibətlərində gərginlik: Diplomatik böhran dərinləşir
Əlcəzair suverenliyinə qarşı istənilən müdaxiləyə sərt şəkildə reaksiya verəcək.
Crossmedia.az Anadolu Agentliyinə istinadən xəbər verir ki, bu barədə Əlcəzair Xarici İşlər Nazirliyi Fransanın Xarici Ticarət naziri Jan-Noel Barronun Əlcəzairin 12 Fransa konsulluq əməkdaşını 48 saat ərzində ölkəni tərk etməyə məcbur etməsini “ədalətsiz” adlandırmasına cavab olaraq bildirib.
Nazirlik qeyd edib ki, bu qərar Fransada Əlcəzair konsulluğunun əməkdaşının nümayişkaranə şəkildə həbsinə cavab olaraq qəbul olunub. Bu isə diplomatik normaların və praktikanın açıq-aşkar pozulmasıdır.
Əlcəzair Xarici İşlər Nazirliyi həmçinin Fransa Daxili İşlər naziri Bryuno Retayonu sərt tənqid edib. Bildirilib ki, o, yalnız şəxsi maraqları üçün "çirkli işlərlə" məşğuldur, siyasi anlayışdan məhrumdur və Əlcəzair-Fransa münasibətlərinin inkişaf istiqamətinə görə məsuliyyət daşıyır.
Əlcəzair tərəfi vurğulayıb ki, həbs olunan konsulluq əməkdaşı diplomatik toxunulmazlığa malikdir. Lakin Fransa hakimiyyəti ona "oğru kimi və alçaldıcı şəkildə" yanaşıb.
Nazirlik diqqətə çatdırıb ki, bu hadisə Fransa və Əlcəzair prezidentlərinin telefon danışığından və Fransa xarici işlər nazirinin Əlcəzairə səfərindən sonra münasibətlərin sabitləşməyə başladığı bir vaxtda baş verib.
Əlcəzair Xarici İşlər Nazirliyi vurğulayıb ki, Fransa daxili işlər nazirinin Əlcəzairin suverenliyini pozan istənilən gələcək addımı qarşılıqlılıq prinsipi əsasında "qəti və adekvat" cavabla qarşılanacaq.
Xatırladaq ki, 11 aprel tarixində Fransada müxalifətçi Amir Buxorsun (“Amir DZ” kimi tanınır) guya oğurlanması ilə əlaqədar olaraq üç əlcəzairli, o cümlədən konsulluq əməkdaşı həbs olunmuşdu. Onlar Fransada ağır cinayətlər törətməkdə ittiham olunurlar. 13 aprel tarixində Əlcəzair XİN Fransanın səfiri Stefan Romateyi çağıraraq etiraz notası təqdim edib. 14 apreldə isə Əlcəzair 12 Fransa konsulluq əməkdaşının 48 saat ərzində ölkəni tərk etməsini tələb edib.
Zəhra Məmmədova
15:10 15.04.2025
Oxunuş sayı: 1004
