“Arxı keçmədən “hop” deyən Ermənistan”: “Manipulyatv yanaşma və siyasi alver”
Azərbaycanın xarici işlər naziri Ceyhun Bayramov bir neçə gün əvvəl “Anadolu” agentliyinə müsahibəsində deyib ki, Azərbaycanın Ermənistanın 30 illik işğalına son qoyması ilə iki ölkə arasında münasibətlərin normallaşması və Cənubi Qafqaza sülhün gəlməsi üçün fürsət yaranıb
O, rəsmi Bakının 2021-ci ildə İrəvana düşmənçilik səhifəsini bağlamağı təklif etdiyini və bu çağırışın təxminən bir il cavabsız qaldığını xatırladıb:
“2022-ci ilin ilk aylarında sülh razılığının beş əsas bəndini Ermənistana təqdim etdikdən sonra həmin ilin oktyabr ayında iki ölkə arasında müzakirələr başlayıb. Sülh sazişinin ilk layihəsi də Azərbaycan tərəfindən yazılıb və Ermənistana təqdim edilib. Danışıqlar təxminən iki il yarım çəkib. Təxminən bir ay əvvəl müzakirələr başa çatıb və mətnlə bağlı razılıq əldə olunub. Danışıqlar davam edərkən biz Ermənistanı və prosesdə maraqlı olan digər ölkələri bu məsələlərlə bağlı məlumatlandırmışıq. Həll edilməli olan mühüm amillər mövcuddur. Bunlardan ən önəmlisi Ermənistan Konstitusiyasında Azərbaycanın ərazi bütövlüyünə qarşı iddiaların yer almasıdır. Bu, davam etdikcə sülh sazişinin imzalanması mümkün deyil. Ermənistan Konstitusiyasının dəyişdirilməsi vacibdir”.
Azərbaycan müxtəlif səviyyələrdə dəfələrlə Ermənistanın konstitusiya dəyişikliyinə dair haqlı tələbini ifadə edib. Ermənistan isə bu tələbə məhəl qoymadan sülh sazişindən danaşır. Bu, diplomatik dillə desək, siyasi ardıcıllığın olmamasından xəbər verir. Sadə dillə isə görünən odur ki, İrəvan “arxı keçmədən “hop” deyir”.
Bu barədə Crossmedia.az-a danışan Milli Məclisin deputatə Tural Gəncəliyev bildirib ki, Ermənistan hələ də konstruktiv mövqe sərgiləməkdən yayınır. O qeyd edib ki, Antalya Diplomatiya Forumunda Ermənistan xarici işlər nazirinin Azərbaycanın xarici siyasət rəhbərinin ünvanladığı sualdan müxtəlif bəhanələrlə yayınmağa çalışması, bu ölkənin hələ də konkret addım atmağa hazır olmadığını göstərir. Deputatın sözlərinə görə, sülh prosesinin irəliləməsi üçün Ermənistan ilk növbədə konstitusiyasında yer alan, Azərbaycana qarşı ərazi iddialarını əks etdirən müddəaları ləğv etməlidir: “Forumdan sonra Ermənistan rəsmilərinin və ekspertlərinin açıqlamalarında ATƏT-in Minsk qrupunun həmsədrlik institutunun ləğv olunmasına etiraz edilmədiyi açıq görünür. Bu isə Ermənistanın manipulyativ yanaşmanın və siyasi alver cəhdlərinin bariz nümunəsidir. Ermənistan sanki konstitusiyasında dəyişiklik edərək Azərbaycana qarşı ərazi iddiasından imtina etməyi Minsk qrupunun həmsədrlik institutunun ləğvi ilə şərtləndirməyə çalışır. Bu cür yanaşma Ermənistanın ikiüzlü və qeyri-səmimi siyasətinin təzahürüdür”. Onun fikrincə, Ermənistan konstitusiyasından Azərbaycana qarşı ərazi iddialarını ehtiva edən müddəalar çıxarılmalı, eyni zamanda ATƏT-in Minsk qrupunun həmsədrlik institutu da ləğv edilməlidir: “Bu, Ermənistanın beynəlxalq hüquq qarşısında daşıdığı birbaşa öhdəlikdir və bu gün Azərbaycan cəmiyyətinin və beynəlxalq ictimaiyyətin əsas gözləntisidir”.
Ləman Həsənova
12:38 15.04.2025
Oxunuş sayı: 1799
