Tramp Administrasiyası Dövlət Departamenti və USAID-in büdcəsini azaltmağı təklif edir
ABŞ prezidenti Donald Trampın administrasiyası Dövlət Departamenti və ABŞ-nin Beynəlxalq İnkişaf Agentliyinin (USAID) maliyyələşdirilməsini 48% azaltmağı təklif edib. Crossmedia.az xəbər verir ki, qurumların ümumi büdcəsi növbəti maliyyə ilində 55,4 milyard dollardan 28,4 milyard dollara endirilə bilər.
Ən böyük ixtisarlar humanitar yardımı (54%) və qlobal səhiyyənin maliyyələşdirilməsini (55%) əhatə edəcək. BMT və NATO da daxil olmaqla beynəlxalq təşkilatlara dəstək üçün nəzərdə tutulan vəsaitlərin demək olar ki, 90%-i geri çağırıla bilər. Lakin MAQATEq (Beynəlxalq Atom Enerjisi Agentliyi) və ICAO (Beynəlxalq Mülki Aviasiya Təşkilatı) kimi bəzi təşkilatlara məqsədli ödənişlər saxlanılacaq.
Sənəddə həmçinin əməkhaqqının və işə qəbulların dondurulması, diplomatlar üçün güzəştlərin azaldılması və Münaqişələrin Həlli Bürosu kimi bəzi bölmələrin bağlanması təklif olunur. Fulbright kimi mədəni mübadilə proqramları da ləğv ediləcək.
Amerika Diplomatları Assosiasiyası bu təklifi “məsuliyyətsiz” adlandırıb və Konqresi onu rədd etməyə çağırıb. Son qərar administrasiya və qanunvericilər tərəfindən veriləcək.
Zəhra Məmmədova
10:36 15.04.2025
Oxunuş sayı: 10429
