Xalq artisti Cəfər Namiq Kamal 75 illik yubileyini səhnədə qeyd edib
Akademik Milli Dram Teatrında N.V.Qoqolun “Müfəttiş” əsəri əsasında hazırlanan tamaşanın premyerası keçirilib. İki hissəli səhnə işi Xalq artisti Cəfər Namiq Kamalın 75 illik yubileyi münasibətilə benefis tamaşa kimi təqdim olunub.
Tamaşa Sabit Rəhmanın tərcüməsində, rejissor Mikayıl Mikayılovun quruluşunda hazırlanıb. Quruluşçu rəssam – Əməkdar mədəniyyət işçisi İlham Elxanoğlu, rejissor assistenti isə Xanımbacı Həsənovadır.
Tamaşadan sonra Cəfər Namiq Kamalın səhnə fəaliyyəti barədə Əməkdar incəsənət xadimi, professor Məryəm Əlizadə, teatrın bədii rəhbəri, Dövlət mükafatı laureatı Mehriban Ələkbərzadə, Teatr Xadimləri İttifaqının sədri, Xalq artisti Hacı İsmayılov və sədr müavini, Xalq artisti İlham Namiq Kamal çıxış ediblər. Onlar sənətkarın həm peşəkarlığını, həm də insani keyfiyyətlərini yüksək qiymətləndiriblər.
Yubilyara Akademik Milli Dram Teatrının “Milli Teatr Mükafatı” və Teatr Xadimləri İttifaqının “Teatr xadimi” qızıl medalı təqdim olunub.
Tamaşada Cəfər Namiq Kamal (Anton Antonoviç Skvoznik) ilə yanaşı, əməkdar artistlər Elşən Cəbrayılov (İvan Aleksandroviç Xlestakov), Şəlalə Şahvələdqızı, Rəşad Bəxtiyarov, Kazım Həsənquliyev, Məzahir Cəlilov, aktrisalar Nigar Güləhmədova (Anna Andreyevna), İlahə Həsənova, Məhsəti Tahirzadə (Mariya Antonovna), aktyorlar Vüsal Mustafayev, Rüstəm Rüstəmov, Elxan Quliyev, Əlfida Cəfərov, Aslan Şirin, Elnur Qədirov, Ramin Şıxəliyev, Cümşüd Zeynalov və Tural İbrahimov da çıxış ediblər.
Ayan Sədi
09:21 14.04.2025
Oxunuş sayı: 991
