ADAU-da yeni dərs vəsaitlərinin təqdimatı olub
Azərbaycan Dövlət Aqrar Universitetinin (ADAU) İnformasiya texnologiyaları kafedrasının əməkdaşları tərəfindən nəşr olunan 7 yeni kitabın təqdimatı keçirilib.
Crossmedia.az xəbər verir ki, tədbirdə əvvəlcə Dövlət Himni səsləndirilib, sonra torpaqlarımızın ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad olunub.
Təqdim olunan “Heyvandarlıqda rəqəmsal texnologiyalar”, “Müasir proqramlaşdırma texnologiyaları”, “Müasir informasiya sistemlərinin idarə edilməsi”, “HTML”, “Rabitə nəzəriyyəsi”, “İnformasiya texnologiyalarının əsasları” “PowerPoint 2019” və “Veb sistemləri və texnologiyaları” adlı dərs vəsaitləri həm professor-müəllim heyəti, həm də tələbələrin istifadəsi üçün nəzərdə tutulub.
Tədbirdə çıxış edən universitetin rektoru Zəfər Qurbanov təqdim olunan dərs vəsaitlərinin xüsusilə informasiya texnologiyaları sahəsində təhsil alan tələbələr üçün qiymətli mənbə olduğunu bildirərək müəlliflərə uğurlar arzulayıb.
Digər çıxış edənlər də vəsaitlərin həm nəzəri, həm də praktiki biliklərə daha da dərindən yiyələnmək istəyənlər üçün zəngin mənbə olduğunu diqqətə çatdırıblar.
17:28 08.04.2025
Oxunuş sayı: 8723
