Su-25 təyyarəsi SOM ŞAHİN raketini sınaqdan uğurla keçirdi
Azərbaycanın şturmavi təyyarəsi Su-25, Türkiyə müdafiə sənayesi tərəfindən hazırlanmış SOM ŞAHİN qanadlı raketinin atəş testlərini uğurla tamamlayıb.
Crossmedia.az xarici mediaya istinadən bildirir ki,, SOM-B1 raketi Azərbaycan Su-25 təyyarəsindən asma sistem və təyyarənin müstəqil atəş sistemi (UBAS) vasitəsilə uğurla atılıb.
Testlərin 2024-cü ildə Türkiyədə yerləşən sınaq poliqonunda keçirildiyi qeyd olunub. Azərbaycan üçün xüsusi olaraq uyğunlaşdırılmış SOM-B1 konfiqurasiyasında olan SOM ŞAHİN raketi Su-25 LAÇİN təyyarəsindən atılaraq, uzaq məsafədəki hədəfi dəqiqliklə vurub. Bununla da, Azərbaycan tərəfindən 2018-ci ildə elan edilən SOM raketlərinin alınması ilə bağlı əsas mərhələ başa çatıb.
Roketsan tərəfindən kütləvi istehsal edilən SOM, Türkiyənin ilk hava bazalı qanadlı raketi kimi tanınır. Əvvəllər mühərrikə qoyulan embarqoya görə Azərbaycan bu raketi əldə edə bilməmişdi. Lakin Türkiyənin yerli istehsalı olan Kale KTJ-3200 turboraket mühərrikinin istifadəyə verilməsi ilə bu məhdudiyyət aradan qalxıb.
Azərbaycanın Su-25 təyyarələri TAI şirkəti tərəfindən LAÇİN layihəsi çərçivəsində modernləşdirildikdən sonra, Türkiyənin istehsalı olan yeni silahların istifadəsinə şərait yaranıb.
SOM ŞAHİN raketinin həm Su-25 təyyarələrində, həm də AKINCI pilotsuz uçan aparatlarında istifadə olunması nəzərdə tutulur. Yaxın vaxtlarda SOM raketinin AKINCI platformasında sınaq atışlarının keçirilməsi planlaşdırılır.
Fatimə Nəbiyeva
13:33 07.04.2025
Oxunuş sayı: 9044
