Tramp: Çinlə yalnız ticarət kəsiri aradan qaldırılarsa, razılaşma əldə ediləcək
ABŞ Prezidenti Donald Tramp Çinlə yalnız Amerika tərəfinin ticarət kəsiri aradan qaldırılacağı təqdirdə razılaşma əldə etməyə hazır olduğunu bildirib.
Crossmedia.az xarici mediaya istinadən xəbər verir ki, “Biz hər il Çin üzündən yüz milyardlarla dollar itiririk. Əgər bu problemi həll etməsək, heç bir razılaşma bağlamayacağam. Razılaşma üçün hazıram, amma onlar profisit (artıq gəlir) məsələsini həll etməlidirlər. Çin hazırda ciddi ziyan görür, çünki hər kəs bilir ki, biz haqlıyıq” – deyə Tramp Florida ştatından Vaşinqtona yola düşməzdən əvvəl jurnalistlərə bildirib.
4 aprel tarixində Çin Xalq Respublikasının Dövlət Şurası ABŞ-dan idxal olunan mallara 34% rüsum tətbiq etdiyini açıqlayıb. Bu addım Trampın 185 ölkədən idxala gömrük rüsumları tətbiq etmək niyyətində olduğu bəyanatına cavab olaraq atılıb.
Zəhra Məmmədova
10:50 07.04.2025
Oxunuş sayı: 1057
