Armen Sarkisyanın xarici vətəndaşlığı ilə bağlı istintaq davam edir
Ermənistanın İstintaq Komitəsi keçmiş prezident Armen Sarkisyanın xarici vətəndaşlığı ilə bağlı aparılan ilkin istintaqın davam etdiyini açıqlayıb. Lakin istintaqın detalları açıqlanmayıb.
Crossmedia.az xəbər verir ki, bu barədə xarici KİV yazıb. Məlumata görə, iş əvvəlcə Ermənistanın Milli Təhlükəsizlik Xidmətində araşdırılıb, daha sonra İstintaq Komitəsinə ötürülüb.
Xatırladaq ki, Armen Sarkisyan 2018-2022-ci illərdə Ermənistanın prezidenti olub. O, 2022-ci ilin yanvarında səlahiyyətlərinin məhdud olduğunu bildirərək vəzifəsindən istefa verib. Ertəsi gün onun prezident seçilməzdən əvvəl Karib hövzəsində yerləşən Sent-Kits və Nevis vətəndaşlığını daşıdığı yazılıb.
İddiaya görə, Sarkisyan bu vətəndaşlığı 500 min dollar məbləğində investisiya qarşılığında əldə edib. Ermənistan Konstitusiyasına əsasən, xarici vətəndaşlığı olan şəxs prezident seçilə bilməz.
Xumar Emilqızı
10:02 04.04.2025
Oxunuş sayı: 12308
