“Risalə” elmi araşdırmalar jurnalının növbəti nömrələrinin təqdimatı olub
Aprelin 2-də Nizami Gəncəvi adına Milli Azərbaycan Ədəbiyyatı Muzeyində “Risalə” elmi araşdırmalar jurnalının yeni nömrələrinin təqdimatı keçirilib.
Crossmedia.az xəbər verir ki, tədbiri muzeyin direktoru akademik Rafael Hüseynov açaraq Ədəbiyyat Muzeyində “Risalə” elmi araşdırmalar jurnalı ilə yanaşı, “Beşlik” - “Qaynaq” mənbələr toplusu, “Şərq” tərcümə toplusu, “Xəzinə” kataloqlar toplusu və “Məclis” mərasimlər toplusunun da nəşr edildiyini diqqətə çatdırıb. Sanballı yazıların toplandığı bu nəşrlərin hər birinin böyük dəyər daşıdığını deyən akademik Rafael Hüseynov “Risalə” jurnalının ədəbiyyatşünaslıq və mədəniyyətşünaslıq problemlərinin elmi araşdırmalarından ibarət məqalələr toplusu olduğunu bildirib. O, yaxın gələcəkdə “Risalə” jurnalının ildə bir dəfə olmaqla ingilis dilində məqalələrdən ibarət nəşrinin nəzərdə tutulduğunu söyləyib.
Akademik Rafael Hüseynov jurnalın yeni sayında işıq üzü görmüş “Apostrofun Azərbaycan dilindəki yeri və ona qarşı olmanın yersizliyi” adlı məqaləsindən də bəhs edib. Bildirib ki, XIX əsrin sonu, XX əsrin əvvəllərində Azərbaycan dilində təxminən minə qədər apostroflu söz olub. Sözlərin leksik-semantik planda məna fərqlərinin müəyyənləşdirilməsində, omoqrafların (şəkilcə omonim, oxşar, vurğusuna görə fərqlənən sözlər) yazılışında, bu sözlərin aydın tələffüzündə, hecaya ayırmasında apostrof vacib köməkçi vasitədir. Həmçinin apostrof klassik ədəbiyyatın düzgün oxunulması üçün əsas vasitələrdən biridir.
Əlifbada apostrofun bərpasının tərəfdarı olduğunu deyən alim vurğulayıb ki, apostrofun qalması Azərbaycan dilini öyrənənlərə bu dili daha dərindən, incəliklərinə qədər öyrətməyə imkan verir. O, apostrofdan dünya dillərində də tələffüzü asanlaşdıran bir işarə kimi istifadə olunduğunu bildirib.
Akademik Rafael Hüseynov “Risalə” elmi araşdırmalar jurnalının filologiya və sənətşünaslıq elm sahələri üzrə Ali Attestasiya Komissiyasının tövsiyə etdiyi dövri elmi nəşrlər siyahısında olduğunu deyib.
Direktor jurnalın yeni nömrələrində muzey əməkdaşlarının, elmlər doktorları, fəlsəfə doktorları, dissertasiya müdafiəsinə hazırlaşan gənc tədqiqatçıların müxtəlif mövzuları ehtiva edən elmi məqalələrinin dərc edildiyini söyləyib. Qeyd edib ki, jurnalın növbəti nömrələrində Faiq Əliyevin “Nəsiminin “ənəlhəq” fəlsəfəsi”, Günel Səfərovanın “Salam Qədirzadənin “Qış gecəsi” romanı”, Elazə Musayevanın “Pirəbədil” xalçaları xarici tədqiqatçıların gözü ilə”, Aytac Həmidovanın “Rüfət Əhmədzadənin həyat yolu”, İlahə Dadaşovanın “Şahin Fazilin “Meylimə imkan eləyən Şahinəm” qəzəli sənətkarın təqdimatı kimi”, Cəmilə Dəmirovanın “Yəhudi şairlərin islama zidd mövqeyi”, Məhəmmədəli Hüseyninin “Sultan Əhməd Cəlairi” və digər məqalələr verilib. O, jurnalda görkəmli yazıçılar Salam Qədirzadə, Rüfət Əhmədzadə və tarixçi, şərqşünas Şahin Fazilin yaradıcılığından bəhs edən məqalələrin də yer aldığını söyləyib.
Çıxışının sonunda akademik Rafael Hüseynov jurnalda dərc olunan məqalələrin elmi əhəmiyyətini qeyd edib, müəlliflərə yaradıcılıq uğurları arzulayıb.
Sonda tədbirdə iştirak edən məqalə müəlliflərinə “Risalə” elmi araşdırmalar jurnalının yeni nömrələri təqdim olunub.
Qeyd edək ki, “Risalə” elmi araşdırmalar jurnalı 2019-cu ildə Ədliyyə Nazirliyinin “Mətbu nəşrlərin reyestri”nə və 2018-ci ildən EBSCO beynəlxalq elektron məlumat bazasına daxil edilib. 2023-cü ildən etibarən jurnalda çap olunan nömrələrə ayrı-ayrılıqda Rəqəmsal Obyekt İdentifikatoru (DOI) verilib.
“Risalə” elmi araşdırmalar jurnalı “Klassik irs: tarixi və nəzəri problemləri”, “Yeni və müasir dövrdə ədəbi-mədəni proses”, “Tarixi-mədəni abidələrin qorunması və tədqiqi. Muzeyşünaslıq” bölmələrindən ibarətdir. Jurnalın yeni nəşrlərini “risale.az” saytına daxil olaraq arxiv bölməsindən izləmək mümkündür.
18:48 02.04.2025
Oxunuş sayı: 1553
