Elmin təhsilə inteqrasiyası istiqamətində növbəti mühazirə - “Avtoqraf nüsxə”
Aprelin 2-də AMEA Məhəmməd Füzuli adına Əlyazmalar İnstitutunda Əlyazmaların və əski çap kitablarının tərcüməsi şöbəsinin baş elmi işçisi dosent Zəkiyyə Əbilova “Avtoqraf nüsxə” mövzusunda mühazirə oxuyub.
Crossmedia.az instituta istinadən məlumat verir ki, Bakı Dövlət Universiteti, Bakı Slavyan Universiteti, Odlar Yurdu və Bakı Avrasiya universitetlərinin tələbələrinin iştirak etdiyi təlimdə Zəkiyyə Əbilova Azərbaycanın Məhəmməd Füzuli, Mir Möhsün Nəvvab, Abbasqulu ağa Bakıxanov şair və yazıçılarından söz açıb. Z.Əbilova onların ərəbdilli və farsdilli əsərlərinin institutda qorunub saxlanılan çap və əlyazma nüsxələrindən bəhs edərək nümunələr göstərib və tələbələrin suallarını cavablandırıb.
Xatırladaq ki, doktorant və dissertantların müvafiq fənlər üzrə ixtisas səviyyələrinin artırılması və gücləndirilməsi məqsədilə institutun Təhsil şöbəsi tərəfindən təşkil olunmuş bu kimi seminarların iyun ayına qədər davam etdirilməsi nəzərdə tutulub.
17:10 02.04.2025
Oxunuş sayı: 904
