KİV: Rusiya ordusu Ukrayna cəbhəsində irəliləyə bilmir
Rusiya ordusu artıq bir aydan çoxdur ki, Ukrayna cəbhəsində irəliləyiş əldə edə bilmir.
Crossmedia.az xəbər verir ki, bu barədə The New York Times qəzeti yazıb.
ABŞ diplomatları Moskvanı atəşkəsə razı salmağa çalışsa da, Rusiya Prezidenti Vladimir Putin dörd Ukrayna vilayətinin tam nəzarətə keçməsini əsas şərt kimi irəli sürür.
Qəzetin yaydığı məlumata görə, cəbhədə döyüşən Ukrayna əsgərləri və komandirləri bildiriblər ki, cəbhənin sabit qalmasına bir neçə əsas faktor təsir edib. Onların sözlərinə görə, son dövrlərdə Ukrayna ordusu yeni müdafiə strategiyalarına keçid edib, dron bölmələrinin daha effektiv istifadəsi təmin olunub və dəyişən təhlükələrə qarşı tez uyğunlaşma baş verib.
Bundan əlavə, Rusiya ordusunun yorğunluğu və Ukrayna əsgərlərinin döyüş ruhunun yüksəlməsi də müharibənin gedişatına təsir göstərib. Xüsusilə yanvar ayında general Mixaylo Drapatın quru qoşunlarının komandanı təyin olunmasından sonra Ukrayna ordusunda motivasiya daha da artıb.
Analitiklər hesab edirlər ki, bu amillər Rusiya ordusunun hücumlarını çətinləşdirir və Ukrayna müdafiəsinin güclənməsinə səbəb olur.
Fatimə Məmmədova
23:10 27.03.2025
Oxunuş sayı: 7508
