Avropa Ukraynanın təhlükəsizliyini təmin etməyə çalışacaq
Ukrayna Prezidenti Volodimr Zelenski Parisdə Fransa Prezidenti Emmanuel Makron ilə görüşünü yarımçıq dayandıraraq, daha üç avropalı jurnalistlə panel müzakirəsinə qatılıb. Müsahibədən sonra Zelenski Makron ilə təkbətək nahar etmək üçün Yelisey sarayına qayıdıb.
Crossmedia.az xarici mediaya əsasən bildirir ki, görüşlərin keçirildiyi muzeyin qarşısında yerləşən Eyfel qülləsi Ukraynanın dövlət bayrağının rəngləri olan sarı və mavi işıqlarla bəzədilib. Zelenski uzunmüddətli atəşkəs olacağı təqdirdə, Böyük Britaniyanın Baş naziri Kir Starmer və Makronun təşkil etdiyi “istəklilər koalisiyası”na 30-a yaxın ölkənin necə töhfə verə biləcəyini müzakirə etmək üçün Parisə gəlib.
Onun Fransada qarşılanması ötən ay Vaşinqtona səfəri zamanı ABŞ Prezidenti Donald Tramp və vitse-prezident Cey Di Vens tərəfindən soyuq münasibətlə qarşılanması ilə tam ziddiyyət təşkil edir. Ağ Evdə ona qarşı sərt mövqe nümayiş etdirildikdən sonra Tramp ABŞ-ın Ukraynaya hərbi və kəşfiyyat dəstəyini dayandırmaq barədə göstəriş verib.
Zelenski Avropa müttəfiqlərinin məsləhəti ilə Tramp və administrasiyası ilə münasibətləri düzəltməyə çalışıb, onun tələb etdiyi yumşaq ritorikadan istifadə edib və ABŞ-ın 30 günlük qeyd-şərtsiz atəşkəs planı ilə razılaşıb. Lakin Trampın yardımı amansızcasına dayandırması Ukraynada və Avropada ciddi narahatlıq yaradıb.
Avropa liderləri ABŞ-la 80 illik ittifaqın hələ də möhkəm olduğunu göstərməyə çalışsalar da, Parisdə 30 ölkənin bir araya gəlməsi artıq ABŞ-ın dəstəyinə tam arxalana bilməyəcəklərini göstərir.
Zəhra Ağayeva
22:45 27.03.2025
Oxunuş sayı: 5655
