Starmer: Sanksiyalar ləğv edilməməlidir
Böyük Britaniyanın Baş naziri Kеir Starmer bildirib ki, hazırda Rusiyaya qarşı sanksiyaların ləğvi üçün doğru zaman deyil. O, Fransada Ukrayna mövzusunda keçirilən zirvəyə qatılan ölkələrin bu məsələdə həmfikir olduqlarını vurğulayıb.
Crossmedia.az Anadolu Agentliyinə istinadən xəbər verir ki , Böyük Britaniyanın Baş naziri Kеir Starmer, Fransanın ev sahibliyi ilə Parisdə keçirilən Ukrayna mövzusunda liderlər zirvəsindən sonra açıqlamalar verib.
Baş nazir Starmer bildirib ki, Avropalı liderlər zirvə zamanı Ukraynaya dəstək məqsədilə hərbi və operativ planları müzakirə ediblər.
O, üç ildən artıqdır olduğu kimi, bu kritik anda da bir çox ölkənin Ukraynanın yanında olduğunu və bu dəstəyi davam etdirəcəyini vurğulayıb.
Keir Starmer əlavə edib ki, zirvəyə qatılan ölkələr Rusiyaya qarşı tətbiq edilən sanksiyaların yumşaldılmaması və onların ləğvi üçün hələ doğru zaman olmadığı barədə ortaq mövqedədirlər.
Rusiyanın vaxtı uzatmaq və vəziyyəti manipulyasiya etmək cəhdlərinin açıq şəkildə göründüyünü qeyd edən Starmer, "Tam əksinə, ABŞ-ın təşəbbüsünü dəstəkləmək və bu ölkələr qrupunun daha güclü təzyiqi ilə Rusiyanı danışıqlar masasına gətirmək üçün sanksiyaların necə artırıla biləcəyini müzakirə etdik",- deyə bildirib.
O, həmçinin vurğulayıb ki, liderlər Ukraynanın həm indi, həm də gələcək danışıqlarda mümkün olan ən güclü mövqedə olması üçün bu ölkəyə daha çox dəstək verilməsinin vacibliyi barədə ortaq razılığa gəliblər.
Pərvin Hacıyeva
22:12 27.03.2025
Oxunuş sayı: 6195
