Tramp ABŞ-a avtomobil idxalına 25 faiz rüsum tətbiq edib
ABŞ Prezidenti Donald Tramp çərşənbə günü avtomobil idxalına 25 faizlik rüsum tətbiq etdiyini açıqlayıb. Ağ Ev bu addımın yerli istehsalı stimullaşdıracağını bildirsə də, ekspertlər bunun qlobal təchizat zəncirlərindən asılı olan avtomobil istehsalçılarını maliyyə çətinliklərinə sala biləcəyini vurğulayırlar.
Crossmedia.az xarici mediaya əsasən bildirir ki, Tramp tarif direktivinin qalıcı olduğunu qeyd edərək, aprelin 3-dən nəqliyyat vasitələrinə rüsumların tətbiq olunacağını bildirib.
Mütəxəssislər xəbərdarlıq edirlər ki, bu tariflər ABŞ avtomobil sənayesinə mənfi təsir göstərə bilər. ABŞ avtomobil istehsalçıları komponentlərini dünyanın müxtəlif yerlərindən aldıqları üçün istehsal xərclərinin artması və satışların azalması riski var.
Bəzi hesablamalara görə, bu rüsumlar tam şəkildə alıcıya ötürülsə, idxal olunan avtomobillərin orta qiyməti 12,500 dollar arta bilər və bu, ümumi inflyasiyaya təsir edə bilər.
Trampın açıqlamasına ilkin bazar reaksiyasında “Ceneral Motors”un səhmləri çərşənbə günü günortadan sonra təxminən 3 faiz, “Cip” və “Krayzler” şirkətlərinin sahibi olan “Stellantis”in səhmləri isə təxminən 4 faiz ucuzlaşıb. “Ford”un səhmlərində isə cüzi artım müşahidə olunub.
Zəhra Ağayeva
21:47 27.03.2025
Oxunuş sayı: 6506
