KİV: Tramp Ukraynada sülh istəyirsə, Putinə təzyiqi artırmalıdır
ABŞ prezidenti Donald Tramp və onun müttəfiqləri, o cümlədən senator Lindsi Qrem son aylarda bildiriblər ki, əgər Rusiya Prezidenti Vladimir Putin sülh səylərini rədd edərsə, ABŞ yeni sanksiyalar tətbiq edəcək.
Crossmedia.az təqdim edir ki, bu barədə xarici KİV yazıb.
Lakin indiyə qədər Kreml ABŞ-nin təklif etdiyi atəşkəsi qəbul etməyə razı olmayıb. Əksinə, Putin bu həftə məhdud dəniz atəşkəsi müqabilində sanksiyaların yumşaldılmasını tələb edib ki, bu da əsasən Rusiyanın maraqlarına xidmət edir. Buna görə də Moskvaya daha çox təzyiq göstərmək vaxtı gəlib çatıb. Putinin müharibəni dayandırmaq niyyətində olmadığı açıq görünür. Martın 18-də Tramp ilə telefon danışığından sonra enerji infrastrukturlarına hücumları müvəqqəti dayandırmağa razılaşsa da, o, bu müddətdə Ukraynanın mülki və enerji obyektlərinə genişmiqyaslı dron və raket hücumları həyata keçirib.
Qeyd edək ki, ABŞ təkcə sanksiyalarla Putini dayandıra bilməz. Yeni sanksiyalar tətbiq edilməklə yanaşı, mövcud sanksiyaların sərt icrası və Ukraynaya genişmiqyaslı hərbi yardım göstərilməsi də vacibdir. Çünki müharibənin taleyi əsasən döyüş meydanında baş verənlərdən asılıdır. Tramp isə məhz bu sahədə təsir gücünə malikdir. ABŞ Konqresindəki respublikaçılar Rusiyanın enerji gəlirlərini hədəfə alan sanksiyaların genişləndirilməsinə və eyni zamanda ABŞ-nin enerji ixracını artıraraq Putinin müharibə büdcəsini zəiflətməyə maraq göstərirlər. Bu istiqamətdə hər hansı qanunvericilik təşəbbüsü həm də prezidentin "Prezidential Drawdown Authority" çərçivəsində Ukraynaya zirehli texnika, uzaqmənzilli silahlar və hava hücumundan müdafiə sistemləri göndərməsinə imkan verməlidir.
Bundan əlavə, Ukrayna Təhlükəsizlik Yardımı Təşəbbüsü üçün maliyyə ayrılması Trampa yeni silah müqavilələri bağlamaq və eyni zamanda ABŞ-nin müdafiə sənayesini gücləndirmək üçün imkan yaradacaq.
Bildirək ki, son iki ayda Tramp administrasiyasının Rusiyaya qarşı yumşaq mövqeyi ABŞ ictimaiyyətində narahatlıq yaradıb. Sorğular göstərir ki, amerikalıların əksəriyyəti Trampın Ukraynaya yetərincə yardım etmədiyini düşünür və onun Rusiyanın tərəfini saxladığını hesab edir. Xüsusilə, Trampın xüsusi nümayəndəsi Stiv Vitkoffun müsahibəsində Kremlin Ukrayna müharibəsini əsaslandıran tezislərini təkrarlaması bu narahatlıqları daha da artırıb. Tramp komandasında Ukraynaya hərbi dəstəyin artırılmasını müdafiə edən şəxslər var. Məsələn, keçmiş xüsusi nümayəndə Kit Kelloq ötən ilin aprelində bildirib ki, əgər Kiyev danışıqlara razılaşmazsa, ABŞ hərbi yardımı dayandırmalı, əgər Moskva sülhə razılaşmazsa, yardım artırılmalıdır. Tramp son aylarda bu yanaşmaya uyğun olaraq Ukraynaya yardımı müvəqqəti kəsdi, lakin Kiyev onun qeyd-şərtsiz atəşkəs təklifini qəbul etdikdən sonra yardımı bərpa etdi.
Hazırda Ukrayna Trampın atəşkəs təklifini qəbul edib, lakin Putin müxtəlif bəhanələrlə sülh prosesini uzadır. Rusiyanın irəli sürdüyü son atəşkəs təklifi ABŞ-nin ilkin planından xeyli uzaqdır – Moskva əvvəlcə sanksiyaların yüngülləşdirilməsini tələb edir. Bundan əlavə, Putin bütün xarici hərbi yardımın və kəşfiyyat məlumatlarının Kiyevə verilməsinin dayandırılmasını istəyir. Bu isə faktiki olaraq Ukraynanı silahsız vəziyyətdə tək qoyaraq müharibəyə fasilə vermək deməkdir. Tramp Putinin bu taktikalarına cavab olaraq öz administrasiyasının dövlət katibinin tövsiyələrini nəzərə almalıdır. Yanvar ayında dövlət katibi Ukraynanın Rusiyaya qarşı üstünlük qazanması üçün daha çox dəstəyə ehtiyacı olduğunu bildirmişdi. Bu isə o deməkdir ki, ABŞ döyüş meydanında Putinin hesablamalarını dəyişməli və Rusiya ordusunun irəliləyişini dayandırmalıdır.
Xumar Emilqızı
21:56 27.03.2025
Oxunuş sayı: 1571
