İsrail-HƏMAS müharibəsi: Girovların taleyi qeyri-müəyyən olaraq qalır
İsrailin, 1800-ə yaxın fələstinli məhbusun əvəzində onlarla israilli girovun azad edilməsi ilə nəticələnən iki aylıq atəşkəsə son qoyaraq, Qəzza zolağının böyük hissəsinin işğalını da əhatə edən yeni və daha genişmiqyaslı quru əməliyyatı planlaşdırdığı bildirilir.
Crossmedia.az xarici mediaya əsasən bildirir ki, Baş nazir Benyamin Netanyahunun HƏMAS-ın idarəetmə və hərbi imkanlarını aradan qaldırmaqda və Qəzzadan gələn hər hansı təhlükəni yox etməkdə qətiyyətli olduğu qeyd edilir. Lakin İsrail cəmiyyətində bunun girovların geri qaytarılmasına kömək edib-etməyəcəyi, yoxsa daha çox dağıntıya və insan itkisinə səbəb olaraq onların həyatını təhlükəyə atacağı ilə bağlı suallar artır.
Nova musiqi festivalına HƏMAS hücumundan sağ çıxan Ron Segev bildirib ki, onun yeganə məqsədi girovların azad edilməsidir. O, verdiyi açıqlamada “Hər kəs evə qayıtmayana qədər irəliləməyəcəyik. Hökumətin məqsədlərini bilmirəm, amma bu, insanlar üçün əsas məqsəddir” deyib.
2023-cü ilin noyabrında atəşkəs zamanı qızı azad edilən Tomas Hand diplomatiyanın girovları xilas edəcəyinə inanmadığını bildirib: “Bizim birinci fazaya (atəşkəs) nail olmağımızın yeganə səbəbi HƏMAS-ın məhv ediləcəyini düşündüyü hərbi əməliyyat idi”.
Çərşənbə axşamı yüzlərlə fələstinli Qəzzada etiraz aksiyası keçirərək, müharibənin dayandırılmasını və HƏMAS-ın güzəştə getməsini tələb edib. Hand bu addımı ümidverici saysa da, mülki vətəndaşların silahlı təşkilata qarşı çıxmasının nəticə verəcəyinə şübhə ilə yanaşır.
Bu ayın əvvəlində İsrail Qəzzaya ərzaq, yanacaq, dərman və humanitar yardım göndərilməsini dayandırıb. İsrail HƏMAS 24-nün sağ olduğu güman edilən 59 girovu qaytarana qədər döyüşləri gücləndirəcəyini bildirib. Eyni zamanda, qruplaşmadan hakimiyyətdən əl çəkməyi, tərksilah olunmağı və liderlərini sürgünə göndərməyi tələb edir.
HƏMAS isə qalan girovları yalnız fələstinli məhbusların azad edilməsi, daimi atəşkəs və İsrailin Qəzzadan çıxması müqabilində buraxacağını açıqlayıb.
İsraillilər son günlər hökumətin girovların azad edilməsi ilə bağlı razılığa gəlməməsinə və yüksək səviyyəli hüquq və təhlükəsizlik rəsmilərini işdən çıxarmasına etiraz olaraq küçələrə axışıblar.
Zəhra Ağayeva
20:55 27.03.2025
Oxunuş sayı: 1256
