Paşinyan onlara hədə-qorxu gəldi: Sizi tapdalayacağam!
Ermənistanın baş naziri Nikol Paşinyan ölkənin üç keçmiş prezidenti—Levon Ter-Petrosyan, Serj Sarkisyan və Robert Köçəryanı Qarabağ məsələsi ilə bağlı yenidən açıq debatlara çağırıb. Crossmedia.az erməni mediasına istinadən xəbər verir ki, o, keçmiş prezidentlərin onu kapitulyasiyada günahlandırmaq istədiyini bildirib və onlara sərt mesaj göndərib.
"Serj Sarkisyanın 2018-ci ildə tərk etdiyi danışıqlar prosesi elə bir vəziyyət yaratmışdı ki, əlavə güzəştlərə getmədən mövqeləri qorumaq mümkün deyildi. Bu proses labüd şəkildə eyni nəticəyə – kapitulyasiyaya aparırdı. 2020-ci ilin noyabrına qədər bütün fəaliyyətlər bu məsuliyyəti mənim üzərimə atmaqdan ibarət idi".
“Canlı efirdə görüşək!” – Paşinyan açıq debat çağırışı etdi
Paşinyan keçmiş hakimiyyət nümayəndələrini açıq müzakirəyə dəvət etdiyini, lakin onların yayınmaq üçün bəhanələr gətirdiyini bildirib:
"Buna görə də onlara deyirəm: gəlin canlı efirdə görüşək və danışaq! Amma nə edirlər? İmtina edirlər, bəhanə gətirirlər. Əgər diskussiya istədiyiniz varsa – gəlin və açıq danışın. Mən sizinlə mübahisə etməyəcəm, sadəcə sizi divara çırpıb paramparça edəcəyəm və siyasi meyitlərinizin qalıqlarını bu arenadan çıxaracaqlar."
O vurğulayıb ki, sabahdan etibarən keçmiş hakimiyyət nümayəndələrinin yalnız iki seçimi var: ya mövzu ilə bağlı susmaq, ya da açıq dialoqa qatılmaq.
"Uşaqları, nəvələri, kürəkənləri, gəlinləri – ya susurlar, ya da açıq dialoqa gəlirlər. Üçüncü yol yoxdur!"
Qarabağ məsələsində qərarvermə hüququ kimə məxsusdur?
Paşinyan bəzi siyasi qrupların “erməni xalqı belə düşünür” tezisini irəli sürməsini tənqid edərək, bunun yalnız dövlətin rəsmi institutları tərəfindən müəyyən edilə biləcəyini bildirib:
"Ermənistan Respublikasının xalqı referendum, seçkilər və s. vasitəsilə qərar verir. Amma kim və hansı hüquqla iddia edir ki, erməni xalqı nə istəyir? Mən Ermənistan Respublikası xalqı adından danışmaq hüququna malikəm. Bəs siz?"
Paşinyanın bu çıxışı Ermənistanın siyasi mühitində gərginliyi artıracaq bir mesaj kimi qiymətləndirilir.
21:42 26.03.2025
Oxunuş sayı: 1333
