Ərdoğan İstanbul meri və sabitliyi pozmaq cəhdləri barədə danışdı
Türkiyə Prezidenti Rəcəb Tayyib Ərdoğan hakim Ədalət və İnkişaf Partiyasının (AK Parti) parlament qrupunun iclasında İstanbul meri və bəzi bələdiyyələrdə korrupsiya iddiaları ilə bağlı açıqlamalar verib.
Crossmedia.az türk mətbuatına istinadən xəbər verir ki, Ərdoğan ölkədə sabitliyi pozmağa çalışanları tənqid edərək bildirib ki, qanunsuz yollarla hakimiyyəti ələ keçirmək istəyənləri unutmayıblar və unutmayacaqlar.
O, Türkiyə iqtisadiyyatına və xalqın rifahına qarşı atılan hər hansı addımın cəzasız qalmayacağını vurğulayıb.
Prezidentin sözlərinə görə, İstanbul meriyası və bəzi rayon bələdiyyələrində korrupsiya, rüşvət və mənimsəmə halları misli görünməmiş səviyyəyə çatıb.
“Onların bütün gizli maxinasiyaları ortaya çıxanda, nəinki xalqın, hətta öz yaxınlarının üzünə baxmağa cəsarətləri qalmayacaq", – Ərdoğan qeyd edib.
O, Cümhuriyyət Xalq Partiyasının (CHP) idarə etdiyi İstanbul bələdiyyələrinin korrupsiya hallarının Braziliya seriallarının süjetlərindən daha çox olduğunu bildirib.
Qeyd edək ki, Prezident CHP-ni küçələri qarışdırmaqda və xalqı böhrana sürükləməkdə günahlandıraraq, onları bu cəhdlərdən çəkinməyə çağırıb.
Fatimə Məmmədova
20:23 26.03.2025
Oxunuş sayı: 8967
