Rumıniya seçkilərdən əvvəl platformaları sınaqdan keçirir
Rumıniya mayın 4-də keçiriləcək prezident seçkilərinin birinci turu öncəsi TikTok, Meta, Google və X-i “seçki stress testi”ndə iştirak etməyə dəvət edib.
Crossmedia.az xarici mediaya əsasən bildirir ki, ölkənin rabitə tənzimləyicisi Ancom-un verdiyi məlumata görə, təlimin məqsədi seçki prosesində iştirak edənlərin potensialını yoxlamaq və seçki dövründə yarana biləcək onlayn problemləri həll etməkdir. Təlimlərə Avropa Komissiyası, milli hakimiyyət orqanları və vətəndaş cəmiyyəti təşkilatlarının nümayəndələri də dəvət olunub. Komissiya stress testində iştirak edəcəyini təsdiqləyib.
Səsvermədən əvvəl platformaların Rəqəmsal Xidmətlər Aktına (DSA) uyğunluğunu yoxlamaq milli tənzimləyicinin səlahiyyətindədir. Lakin bu, noyabr seçkilərindən əvvəl həyata keçirilməmişdi. DSA-ya əsasən, Aİ-də 45 milyondan çox aktiv istifadəçisi olan platformalar əsas hüquqları və ifadə azadlığını qoruyarkən seçki prosesləri ilə bağlı riskləri azaltmaq öhdəliyinə malikdir.
Rumıniyada noyabrda keçirilən prezident seçkiləri Rusiyanın TikTok vasitəsilə millətçi namizəd Kalin Georgescu-ya dəstək verdiyi iddiaları səbəbindən ləğv edilib. Onun TikTok-da populyarlığına görə, Avropa Komissiyası platformanın seçki bütövlüyü ilə bağlı DSA qaydalarını pozub-pozmadığını araşdırmağa başlayıb. Bu işin nəticəsi hələ də açıqlanmayıb.
Rumıniya hakimiyyəti əvvəlki seçkilərdə qaydaları pozduğu üçün Georgescu-nun namizədliyini bu ayın əvvəlində qadağan edib. Martın 3-də isə platformalar prezident seçkiləri kontekstində DSA-nın tətbiqini müzakirə etmək üçün seçki dəyirmi masasına qatılıblar.
Zəhra Ağayeva
20:14 26.03.2025
Oxunuş sayı: 9868
