Polşa Milli Təhlükəsizlik Bürosunun rəhbəri: Ordu tərkibində ərazi müdafiə qüvvələrini gücləndirməliyik
"Rusiya ilə müharibə olarsa, Polşa 14 gündən çox olmayan müddətdə özünü müdafiə edə bilər. Biz ordu tərkibində ərazi müdafiə qüvvələrini (TDF - Territorial Defence Forces) daha da gücləndirməliyik".
Crossmedia.az “Caucasian Live”a istinadla xəbər verir ki, bu barədə Polşa Milli Təhlükəsizlik Bürosunun rəhbəri Dariuş Lukovski məlumat verib.
“Hazırda 14-20 min nəfər arası yeni peşəkar hərbçilərin hazırlanması layihəsi davam edir. Lakin qeyd etməliyik ki, bizim üçün problem odur ki, biz ikinci dünya müharibəsindən sonra ciddi konvensional müharibə təcrübəsi görməmişik. Ölkəmizdə gəncliyi xüsusi şəkildə yetişdirməliyik. Çünki Avropada hazırda gəncliyin çoxu savaşmağa hazır deyil. Misal olaraq, Rusiya Prezidenti Vladimir Putin üçün ölməyə hazır olan böyük insan qrupu var. Mən sizi əmin edirəm ki, Putin olmasa başqası olsa da, ruslar dövlət üçün vuruşacaq, buna görə də bu, bizim ciddi zəifliyimizdir. HHM sistemlərimiz ciddi şəkildə hava məkanını tam qorumaq gücündə deyil.
Rusiya anlayır ki, NATO-nun hava gücü açıq-aşkar üstündür. Ona görə də istənilən toqquşma anında Rusiya, misal üçün, “Oreşnik” tipli raketlərlə hava bazalarını hədəf alıb bizi ləngitməyə çalışacaq. “Oreşnik” hətta təbliğat vasitəsi kimi hesab etsək belə, yenə də buna ciddi yanaşmalıyıq. Çünki Rusiyada nə qədər bu cür raketlər çox olarsa, o zaman onlar nüvə arsenalını işə salmadan bizə ciddi zərbə endirə və mane ola bilərlər. 2022-ci ildəki rus ordusu artıq yoxdur, Rusiyaya daha ciddi yanaşmalıyıq", - deyə o, bildirib.
Nəzrin Salmanova
19:37 26.03.2025
Oxunuş sayı: 9743
