Suriya Türkiyəyə Palmirada hərbi baza verdi
Suriyanın yeni hökuməti Palmira şəhərində Türkiyəyə böyük bir hərbi baza təqdim edib. Bu bazanın Almaniyadakı ABŞ-nin Ramştayn bazası qədər geniş olacağı bildirilir.
Crossmedia.az xəbər verir ki, bu barədə xarici media məlumat yayıb.
Ankara bu qərarla bağlı BMT də daxil olmaqla, bütün böyük gücləri məlumatlandırıb və bəyan edib ki, ona qarşı hər hansı bir təcavüz aktı güc yolu ilə cavablandırılacaq.
Vurğulayaq ki, Palmira tarixi boyunca şərqdən qərbə və şimaldan cənuba uzanan karvan yollarının kəsişmə nöqtəsi olub. Məhz bu səbəbdən Türkiyənin bölgədəki mövqeyini gücləndirməsi ən çox İsraili narahat edir.
Həmçinin İsrail mediasında yayımlanan şərhlərə görə, Türkiyənin Suriyada hərbi mövcudluğu İsrail üçün təhlükə yaradır. Ekspertlər bildirir ki, Ankara istənilən an öz hərbi qüvvələrini Suriyanın şimalından Palmira istiqamətinə yönləndirə bilər.
Bundan əlavə, bu baza Türkiyənin regiondakı hərbi gücünü daha da artıracaq.
Qeyd edək ki, İsrail rəsmiləri bu prosesin qarşısını almaq üçün ABŞ ilə danışıqlar aparmağın vacibliyini vurğulayır. Həmçinin, Türkiyəyə qarşı balans yaratmaq məqsədilə Rusiyanın Suriyadakı hərbi bazalarının qorunub saxlanmasının dəstəklənməsi təklif edilir.
Fatimə Məmmədova
12:55 26.03.2025
Oxunuş sayı: 7146
