Şimali Koreyadan Rusiyaya 12 min işçi göndərildiyi bildirilir
Şimali Koreyanın Rusiyanın Tatarıstan Respublikasında yerləşən “Alabuqa” xüsusi iqtisadi zonasında “Şahid” tipli hücum pilotsuz uçuş aparatlarının (PUA) istehsalı üçün 12 minə qədər işçi göndərdiyi bildirilir.
Crossmedia.az xəbər verir ki, ABŞ-nin Strateji və Beynəlxalq Araşdırmalar Mərkəzi (CSIS) və Corc Buş İnstitutu bu barədə birgə hesabat yayıb.
Hesabata əsasən, şimali koreyalı işçilərə saatda təxminən 2,5 ABŞ dolları əməkhaqqı nəzərdə tutulub. Lakin onların qazancının 70–90%-nin Şimali Koreya hakimiyyəti tərəfindən mənimsənildiyi bildirilir.
Müəssisədə Şimali Koreya vətəndaşları ilə yanaşı, əsasən tələbələrdən ibarət rusiyalı gənclər və digər ölkələrdən cəlb olunan xarici işçilər də çalışırlar.
Araşdırma müəllifləri müəssisənin işçi qüvvəsini üç əsas qrupa ayırırlar: rusiyalı gənclər, xarici işçilər və Şimali Koreya vətəndaşları.
Hesabatda Rusiya tərəfinin ilk iki qrupa münasibətdə məcburi əmək praktikasından istifadə edə biləcəyi qeyd olunur.
Tədqiqatçıların fikrincə, Şimali Koreya hakimiyyəti isə öz vətəndaşlarını dövlət səviyyəsində məcburi əməyə göndərir və onların əməkhaqqının böyük hissəsini öz nəzarətində saxlayır.
Müəlliflər “Alabuqa” müəssisəsindəki əmək şəraitini ciddi insan hüquqları pozuntuları və insan alveri riski baxımından qiymətləndirirlər.
13:56 21.10.2026
Oxunuş sayı: 80
