Kreml Ukraynaya hərbi yardımın dayandırılmasını əsas prioritet hesab edir
Rusiya Qərbin Ukraynaya hərbi yardımını tamamilə dayandırmasını tələb edir, xüsusilə ABŞ-dən edilən silah tədarükünün kəsilməsini "minimum məqsəd" kimi görür.
Rusiya Prezidenti Vladimir Putin martın 13-də bəyan edib ki, Moskva Birləşmiş Ştatlar və Ukrayna arasında razılaşdırılmış 30 günlük atəşkəsə açıqdır. Lakin bunun üçün Ukraynanın xarici hərbi yardım qəbulunu dayandırması və səfərbərlik prosesini dondurması əsas şərt kimi irəli sürülüb.
Ekspertlər bu şərtlərin gələcəkdə Ukraynanın təhlükəsizlik məsələlərində çətinliklərlə üzləşə biləcəyi ilə bağlı narahatlıq yaratdığını bildirirlər. Çünki oxşar məhdudiyyətlər Rusiya Silahlı Qüvvələrinə şamil edilmir.
ABŞ administrasiyası mart ayının əvvəlində Ukraynaya hərbi yardımı müvəqqəti dayandırsa da, martın 11-də Ciddədə aparılan danışıqlardan sonra bu yardım bərpa edilib. Hazırda ABŞ Ukraynaya dəstəyi əvvəlki Prezident Co Bayden tərəfindən təsdiqlənmiş prezidentin fövqəladə səlahiyyətləri çərçivəsində ayırdığı yardım paketləri hesabına davam etdirir.
Yeni ABŞ administrasiyası hələlik Ukraynaya əlavə hərbi yardımın təsdiqlənməsi ilə bağlı qərar verməyib. Tramp Ukrayna münaqişəsində ABŞ-nin uzunmüddətli iştirakına qarşı olduğunu bir neçə dəfə bəyan edib.
Eyni zamanda, Avropa İttifaqı Ukraynaya hərbi dəstəyi davam etdirmək niyyətindədir. Aİ ölkələri ABŞ-dən gələn yardımın qeyri-müəyyən olması fonunda Ukraynanın müdafiə qabiliyyətini gücləndirmək üçün əlavə alternativlər üzərində işləyir.
Nigar Yahyazadə
23:31 18.03.2025
Oxunuş sayı: 1016
