Hakan Fidan: "Bölgədə terror ünsürlərinin zərərsizləşdirilməsi vacibdir"
Türkiyənin xarici işlər naziri Hakan Fidan Suriya səfərindən sonra canlı yayımda mühüm açıqlamalar verib.
Crossmedia.az türk mediasına istinadən xəbər verir ki, o, bölgədəki təhlükəsizlik vəziyyətinə toxunaraq, terror fəaliyyətlərində iştirak edən silahlı ünsürlərin tamamilə zərərsizləşdirilməsinin və əhalinin normal həyata qayıtmasının vacibliyini vurğulayıb.
“Suriyada yeni dövr başlayıb”
Hakan Fidan, 8 dekabr 2024-cü ildən etibarən Suriyada yeni bir mərhələnin başladığını qeyd edərək, bu prosesin həm tarixi fürsətlər, həm də ciddi çağırışlar gətirdiyini bildirib:
"Yeni administrasiya və Suriya xalqı çətin bir vəziyyətlə üzləşib. Ölkəni aclıq və yoxsulluq içində tərk etmiş bir liderin qalıqları ilə baş-başa qalıblar. İndi isə həm daxili, həm də beynəlxalq dəstəyə ehtiyac duyurlar.”
“Suriyaya hərtərəfli dəstək vacibdir”
Türkiyə XİN rəhbəri vurğulayıb ki, Suriya xalqına yardım göstərmək və bölgədə sabitliyi təmin etmək beynəlxalq ictimaiyyətin tarixi məsuliyyətidir. O, Türkiyənin bu çərçivədə öz təhlükəsizlik maraqlarını da nəzərə aldığını bildirib:
"Suriyadakı qeyri-sabitlikdən sui-istifadə edən terror təşkilatları var. Bizim əsas prioritetimiz təhlükəsizliyimizi təmin etmək və bu təhdidlərin qarşısını almaqdır."
“Terror ünsürləri tənlikdən çıxarılmalıdır”
Fidanın sözlərinə görə, Türkiyə Suriyada sabitliyin bərqərar olması üçün hərtərəfli müzakirələr aparır:
"Bölgədə terror fəaliyyətlərində iştirak edən bütün silahlı ünsürlərin tənlikdən çıxarılması və əhalinin normal həyata qayıtması vacibdir. Müdafiə nazirimiz və Milli Kəşfiyyat Təşkilatının (MİT) rəhbəri ilə birgə bu məsələləri ətraflı müzakirə etdik. Səfərimiz məhsuldar keçdi və qarşılıqlı əməkdaşlığın gücləndirilməsi üçün yeni imkanlar yaratdı".
Türkiyə, Suriyada həm humanitar, həm də təhlükəsizlik baxımından aktiv rol oynamağa davam edəcəyini və bölgədə sülhün bərqərar olması üçün səylərini gücləndirəcəyini bildirib.
Aybəniz Səfərova
23:28 14.03.2025
Oxunuş sayı: 742
