Zelenski: "Putin sülh istəmir, müharibəni davam etdirmək üçün bəhanə axtarır"
Ukrayna Prezidenti Volodimir Zelenski Rusiya Prezidenti Vladimir Putinin müharibəni davam etdirmək niyyətində olduğunu bildirib.
Crossmedia.az xarici KİV-ə istinadən xəbər verir ki, onun sözlərinə görə, Putin müharibədən geri çəkilə bilməz, çünki bu halda o, bütün siyasi və strateji mövqelərini itirəcək.
"Putin müharibəni bitirməyəcək"
Zelenski sosial media hesabında verdiyi açıqlamada ABŞ-nin Rusiya-Ukrayna müharibəsinə son qoymaq üçün irəli sürdüyü 30 günlük atəşkəs təklifini dəyərləndirib.
O, Ukraynanın Səudiyyə Ərəbistanının Ciddə şəhərində keçirilən görüşdə bu təklifi qəbul etdiyini xatırladaraq, Rusiyanın isə atəşkəsə razılıq vermək əvəzinə müxtəlif şərtlər irəli sürdüyünü vurğulayıb.
Ukrayna lideri Putinin hər zaman yeni tələblər irəli sürərək müharibəni uzatmağa çalışdığını bildirib:
"Putin bu müharibədən çıxa bilməz, çünki onda heç nə qalmayacaq. O, diplomatiyanın uğursuzluğa düçar olması üçün əlindən gələni edir. Daha əvvəl Minsk danışıqlarında da eyni taktikadan istifadə edərək prosesi qəsdən uzadıb. Onun məqsədi müharibəni davam etdirməkdir."
"ABŞ-nin təzyiqi müharibəni dayandıra bilər"
Zelenski Putinin sülh danışıqlarını əngəllədiyini və Rusiyanın yalnız güc qarşısında geri çəkiləcəyini bildirib:
"Putinin irəli sürdüyü hər şərt diplomatiyanın qarşısını almağa yönəlmiş bir oyundur. Rusiya belə işləyir. Lakin ABŞ-nin gücü onu müharibəni dayandırmağa məcbur edə bilər. Əgər Vaşinqton kifayət qədər təzyiq göstərərsə, bu müharibəyə son qoymaq mümkün olacaq."
O, Ukraynanın atəşkəsin təmin edilməsi üçün ABŞ ilə effektiv və sürətli əməkdaşlığa hazır olduğunu vurğulayaraq, müharibənin hər gün daha çox insan həyatına son qoyduğunu xatırladıb:
"Biz müharibə oyunları oynamaq istəmirik. Hər gün xalqımızın həyatı itirilir və bu, bizim üçün ən dəyərli şeydir."
Ukrayna lideri beynəlxalq ictimaiyyəti müharibənin uzanmasına səbəb olan Rusiya siyasətinə qarşı daha sərt addımlar atmağa çağırıb.
Aybəniz səfərova
22:57 14.03.2025
Oxunuş sayı: 1454
