Putin ABŞ-ın xüsusi nümayəndəsi Uitkofu qəbul etdi – Trampa hansı mesajlar göndərildi?
Rusiya prezidenti Vladimir Putin martın 13-ü axşam saatlarında ABŞ-ın xüsusi nümayəndəsi Stiv Uitkofu qəbul edib və onun vasitəsilə ABŞ prezidenti Donald Trampa məlumat ötürüb.
Bu görüş barədə Kremlin sözçüsü Dmitri Peskov məlumat verib. O bildirib ki, Uitkof gecə saatlarında prezident Putin tərəfindən qəbul edilib və Rusiya tərəfinə əlavə məlumat təqdim olunub. Peskovun sözlərinə görə, Putin Uitkof vasitəsilə prezident Trampa əlavə siqnallar göndərib və ehtiyatlı nikbinlik üçün əsaslar mövcuddur.
Crossmedia.az xarici mediaya əsasən bildirir ki, bəzi mənbələrdə Uitkofun Putinlə görüşə bilmədiyi və yalnız Moskvadakı ABŞ səfirliyini ziyarət etdiyi iddia olunur. Məlumata görə, Uitkof səfirlikdə təxminən bir saat qalıb və Putinlə görüşünü gözləyib. Lakin bəzi Rusiya KİV-ləri onun prezidentlə görüşə bilmədiyini qeyd edir.
Bu ziddiyyətli məlumatlar görüşün baş tutub-tutmaması barədə suallar yaradır.
Uitkofun Moskvaya səfəri ABŞ və Rusiya arasında gərgin münasibətlərin fonunda baş verir. Xüsusilə Ukrayna münaqişəsi, Qərbin Rusiyaya qarşı tətbiq etdiyi sanksiyalar və təhlükəsizlik məsələləri iki ölkə arasında əsas müzakirə mövzularından biridir. Bu baxımdan, Uitkofun səfərinin məhz indi baş tutması Vaşinqton və Moskva arasında müəyyən diplomatik gedişlərin olduğuna işarə edir.
Bununla belə, Rusiya və ABŞ rəsmiləri görüşlə bağlı tam detallı açıqlama vermədiyindən, Putinin Trampa hansı mesajları ötürdüyü və bunun iki ölkə arasındakı münasibətlərə necə təsir edəcəyi hələlik qeyri-müəyyən olaraq qalır.
Zəhra Ağayeva
18:40 14.03.2025
Oxunuş sayı: 639
